Saparbaev tórtinshi munaı óńdeý zaýytyn Aqtóbede salýdy usyndy
Úkimet basshysy Baqytjan Saǵyntaevqa óńirdiń damýy týraly baıandama jasaǵan oblys ákimi Berdibek Saparbaev birneshe usynys berdi. Aldymen tórtinshi munaı óńdeý zaýytyn Aqtóbede salý oıyn jetkizdi.
«Memleket basshysy tórtinshi munaı óńdeý zaýytyn salýdy tapsyrdy. Sońǵy jyldary Aqtóbede munaı óndirisi artty. Bıyl kem degende 6 mıllıon tonna munaı óndiriledi. Óńirde 360 mıllıon tonna munaı qory bar, ári Jańajol ken ornynda temirjol, tasjol, jaryq, gazdyń bári jetip tur. Biz arqyly Eýropaǵa da, Azııaǵa da ótýge bolady. Ótinishimiz - tórtinshi munaı óńdeý zaýytyn Aqtóbede salý. Usynys Energetıka mınıstrligine berildi. Investorlar bar»,- dedi oblys ákimi Berdibek Saparbaev.
Úkimet basshysy Baqytjan Saǵyntaev tórtinshi munaı óńdeý zaýytynyń jobasy jasalyp jatqanyn, qyrkúıek aıynda daıyn bolatynyn jetkizdi. Al jańa zaýyttyń qaı óńirde salynatyny ázirge belgisiz.
Jıyn kezinde óńir basshysy Berdibek Saparbaev «Buqara - Oral» baǵytynda úshinshi gaz qubyryn salý usynysyn aıtty. Sebebi, eki gaz qubyrynyń kúshi suranysty tolyq qamtamasyz ete almaı otyr.
«Qubyr arqyly saǵatyna 195 myń tekshe metr gaz jiberýge bolady. Qazir 225 myń tekshe metr gaz ótkizilip jatyr. Qosymsha áleýmettik nysandar salynsa, bárine gaz kerek. Sondyqtan úshinshi gaz qubyryn memlekettik-jekemenshik seriktestikke salýǵa usynys beremiz. Aqtóbede altyn da óndiriledi. Sońǵy 50 jylda altyn rýdasynyń bári Reseıge tasymaldanyp jatyr. Endi ınvestorlar shıkizatty jergilikti jerde óńdeýdi kózdep otyr. Bıýdjetten 1 teńge bólinetin bolsa, 15 teńge bolyp keri qaıtady. Altyn óndiretin zaýyttyń ınfraqurylymyna qosymsha qarjy suraımyz», - dedi oblys ákimi Berdibek Saparbaev.
