Saparbaev Tarazdaǵy qoǵamdyq kólikterdi elektrondy bılettendirý jumystaryn synǵa aldy
TARAZ. QazAqparat – Jambyl oblysynyń ákimi Berdibek Saparbaev Tarazdaǵy qoǵamdyq kólikterge elektrondy tólem júıesin engizý jumystaryn synǵa aldy. Buǵan qala turǵyndarynan túsken tolassyz shaǵymdar sebep boldy, dep habarlaıdy QazAqparat tilshisi.
8 qazannan bastap oblys ortalyǵynyń avtobýstarynda elektrondy bılet júıesi engizilgen bolatyn. Ol boıynsha «TulparCard» kartalary barlarǵa tólem quny burynǵy 65 teńge deńgeıinde qalsa, qolma-qol aqshalaı tólem 130 teńgege ósken.
Ókinishke oraı, qala turǵyndarynyń kópshiligi atalǵan kartany satyp alýǵa asyqpaǵan syńaıly. Sońǵy kúni ǵana karta alýǵa umtylǵan qalalyqtardyń qarasy qalyńdap, saldarynan saýda núktelerinde uzyn-sonar kezek paıda bolǵan. Kartalardyń taýsylýyna baılanysty keıbir saýda oryndary tolyǵymen jabyldy.
«Adamdarǵa jaqsylyq jasaǵymyz keldi, biraq sizder bárin joqqa shyǵarýdasyzdar! Dári alýǵa kezekte turǵan adamdar endi tólem kartasyn alýǵa kezekke úıildi. Bul ne masqara? Dúńgirshekte 20 ǵana karta qalǵan, al kezekte 40 adam tur. Nege munyń bárin aldyn ala
oılastyrylmaǵan?» - dep surady aımaq basshysy kezdesýde jaýapty tulǵalardan.
Jolaýshylar kóligi jáne avtomobıl joldary basqarmasynyń basshysy Baqytjan Jánibekovtiń aıtýynsha, eki aı buryn, aqshany qolma-qol tólep júrgen kezde-aq jol aqysynyń ózgerýi týraly eskertilgen.
«Qyrkúıek aıynyń basynda azamattar kúnine eń kóp degende 700 kartadan satyp alyp otyrdy. Al, sońǵy kúni bári aǵyla tústi», - dep aqtaldy basqarma basshysy.
Bul jaýap oblys ákimin qanaǵattandyrmady. «Kartany qaı ýaqytta alatynyn halyq ózi biledi. Bul jerde másele kartalardyń jetispeýshiligi bolyp otyr. Sizder bul týraly aldyn ala oılastyrýlaryńyz kerek edi, endi mine halyqtyń narazylyǵyn kórip otyrsyzdar», - dep atap ótti aımaq basshysy.
Oblys ákiminiń orynbasary Ulan Jazylbek te mán-jaıdy túsindirýge tyrysty.
«Tek keıbir ǵana valıdator jumys istemeıdi. Tólemdi bir kartochkadan eki ret jasaý múmkin emes. Kartalar jetkilikti», - dep atap ótti ol.
Berdibek Saparbaev áleýmettik jelilerdegi azamattardyń shaǵymdaryn kórsetti. «Siz turǵyndardy aıyptaı almaısyz. Kiná ózimizden. Munda olar: «Biz qalanyń jartysyn aınalyp shyqtyq, karta tabylmady», «Lermontovtaǵy karta úshin eki áıel julysty» dep jazady. Mundaı shaǵymdar óte kóp. Joq jerden másele týyndatyp otyrsyzdar jáne
ony túzeý úshin eshqandaı shara qoldanbadyńyzdar», deı kele Berdibek Mashbekuly Ulan Jazylbekke, qalalyq ákimdikke, jolaýshylar kóligi jáne avtomobıl joldary basqarmasyna jaǵdaıdy tez arada túzetýdi tapsyrdy.
