Saparbaev Sulýkólde órtten qaza bolǵandardyń otbasynda boldy
AQTÓBE. QazAqparat - Aqtóbe oblysynyń ákimi Berdibek Saparbaev Áıteke bı aýdany, Sulýkól aýylyna baryp, órt kezinde qaza bolǵan adamdardyń otbasyna baryp, kóńil aıtty, dep habarlaıdy QazAqparat tilshisi.
Aqtóbe oblysynyń Áıteke bı aýdanyna jumys saparymen barǵan Berdibek Saparbaev aldymen Qarabutaq aýylynyń turǵyndarymen kezdesti. Bilim, densaýlyq saqtaý, aýyl sharýashylyǵy, ınfraqurylymdy damytý, jańa jumys oryndaryn ashý týraly aıtylǵan jıyn kezinde turǵyndar óz suraqtaryn qoıdy.
«Aqtóbe aqparat» ortalyǵynyń habarlaýynsha, óńir basshysy jumys sapary kezinde Sulýkól aýylyna bardy. Dala órti kezinde qaza bolǵan adamdardyń otbasyna kóńil aıtyp, arnaıy komıssııa qurylǵanyn, kináliler jazalanatynyn jetkizdi.
«Oqıǵany tergeý jumystary júrip jatyr, arnaıy komıssııa quryldy. Kináliler zań boıynsha jazalanady. Biz óz tarapymyzdan jan-jaqty kómek beremiz jáne eshkimdi eskerýsiz qaldyrmaımyz»,- dedi oblys ákimi Berdibek Saparbaev.
Óńir basshysy Áıteke bı aýdanynyń ákimi Málimbet Ibrashevke aldaǵy ýaqytta mundaı jaǵdaıdyń qaıtalanbaýyn, órt kezindegi qaıǵyly oqıǵany jiti baqylaýda ustaýdy tapsyrdy.
Eske salsaq, Áıteke bı aýdany, Sulýkól aýdanyndaǵy dala órti kezinde 4 adam qaza boldy . Olar: aýyl ákimi Batyrbek Birlepesov, muǵalim Joldybek Ábdisálimov, mektep kúzetshisi Jomart Smaılov pen sharýa qojalyǵynyń jumysshysy Jańabaı Ábishev. Aýyl órti sapalaqpen jáne arnaıy qurylǵymen sóndirilgen. Qazir osy oqıǵaǵa baılanysty qylmystyq is qozǵaldy, tergeý júrip jatyr. Ári is protsessýaldy prokýrordyń baqylaýyna alyndy.
