Saparbaev shańǵy tebýge arnalǵan demalys ornyn synǵa aldy
AQTÓBE. QazAqparat - Aqtóbe qalasyndaǵy Kirpishti aýdanynda ornalasqan shańǵy tebýge arnalǵan demalys ornynyń jaǵdaıy óte nashar. Jóndeý jumystaryn júrgizýge kásipkerdiń qarjysy joq. Berdibek Saparbaev adam uıalatyndaı demalys bazasyn sport mektebine alýdy tapsyrdy, dep habarlaıdy QazAqparat tilshisi.
Aqtóbede qysqy sport túrleri kenjelep qalǵan. Óńirdegi jalǵyz sport mektebiniń balalary qysta shańǵy, konkı tebýge mashyqtanǵanymen, olardyń jyl boıy daıyndalýyna múmkindik joq. Al shańǵy tebýge yńǵaıly demalys bazasynyń jaǵdaıy kóńil kónshiterlik emes.
«Jan-jaǵyn qorshap, retke keltirýdi tapsyrdyq. Biraq esh nátıje joq. Ótken jyly oblystyq, qalalyq dene shynyqtyrý jáne sport basqarmasyna tapsyrma berip, jóndeý júrgizý qajet ekenin aıttym. Mynaý uıat, masqara. Demalys bazasy qulaıyn dep tur. Ony jóndeýge kásipkerdiń qarjysy joq. Hokkeı alańyndaǵy qaqpalar qırap, qulap jatyr, qorshalmaǵan. Balalar sportpen shuǵyldanǵysy keledi, al demalys bazasy olarǵa qajetti jaǵdaı jasaı almaıdy», - dedi oblys ákimi Berdibek Saparbaev.
Aldaǵy ýaqytta demalys bazasy qysqy sport túrleri boıynsha oblystyq balalar jáne jasósirimder sport mektebine berilýi múmkin. Óńir basshysy B.Saparbaev 50 mıllıon teńgege deıin qarjy bólip, jóndeý júrgizýge tapsyrma berdi.
Aıta keteıik, 2003 jyly týǵan balalar arasynda el birinshiligi ótip, aqtóbelik Batyrjan Demeýjan shańǵy jarysynan eki dúrkin jeńimpaz atandy. Bul qysqy sport túrleri boıynsha Aqtóbe tarıhyndaǵy alǵashqy jeńis.
