Saparbaev: Salafızmge zańdy túrde tyıym salý kerek
Aqtóbede Parlament Májilisiniń Halyqaralyq ister, qorǵanys jáne qaýipsizdik komıteti kóshpeli otyrys ótkizgen bolatyn. Jıyn kezinde Májilis tóraǵasy Nurlan Nyǵmatýllın terrorlyq áreketti júzege asyrmaq bolǵan 220-dan astam adamnyń jazalanǵanyn aıtty .
Qazir Aqtóbe oblysynda jaǵdaı turaqty. Ótken jyly Bas Prokýratýranyń «Halyq qaýipsizdigi úshin» atty jumysy bıyl jergilikti jerde jalǵasyp, jat aǵymdy nasıhattaıtyn birqatar saıttar jabyldy. Degenmen másele áli tolyqqandy sheshimin tapqan joq.
«Quqyq qorǵaý organdary salafızm baǵytyn ustanatyn 64 adamdy ustady. Bul baǵyttaǵy jumys ári qaraı jalǵasady. Sonymen qatar, sol quqyq qorǵaý organdarymen birlese otyryp jat aǵym jeteginde júrgen adamdardyń tolyq tizimi jasaldy. Qazir olardyń sany - 2255. Ótken jyly 2450 adam bolǵan edi. Sońǵy 7 aıda destrýktıvti dindi ustanatyndar 197 adamǵa deıin qysqardy. Bizde árqaısysy týraly aqparat bar. Olardyń nemen aınalysatyny, qaıda jumys isteıtini, kimdermen aralasatyny, otbasy týraly tolyq málimet jınaqtalǵan, jeke jumys júrip jatyr. Ásirese, aýylda. Ákimnen bastap, ýchaskelik ınspektor, ardagerler, qoǵamdyq uıym ókilderi túsindirý jumystaryn jalǵastyryp keledi», - dedi oblys ákimi Berdibek Saparbaev.
Qazir Aqtóbedegi qarý-jaraq dúkenderiniń bárinde dabyl túımesi jumys istep tur. Bárine beınekamera qondyrylyp, qarý-jaraq saqtaý qoımasynyń qaýipsizdigi kúshteıtildi. Dúkenderden túsetin dabyl aldymen oblystyq ishki ister departamentiniń arnaıy qyzmetine, halyqqa qyzmet kórsetý ortalyǵyna jetedi. Jıyn kezinde oblys ákimi Berdibek Saparbaev terrorızm jáne dinı ekstremızmmen kúrestiń birneshe jolyn usyndy.
«Aldymen salafızmge zańdy túrde tyıym salý qajet. Sonymen qatar, elimiz boıynsha tyıym salynǵan ádebıetter tizimin qaıta qarap, olardy joıý jumystaryn jandandyrǵan durys. Bizge áıel teologtar kerek. Sebebi jat aǵym jeteginde júrgenderdiń 30 paıyzy áıelder. Balalardy vaktsınatsııalaý da mańyzdy. Bul problema aldaǵy ýaqytta ýshyǵyp ketýi múmkin. Qazir óńirde 2500-den astam bala ekpe almaǵan. Bári sol dinı kózqarasta júrgen ata-analardyń balalary. Dinı joǵary bilimdi shetelde emes, elimizde alǵan durys. Bizdiń oıymyzsha, jergilikti jerdegi joǵary oqý oryndarynda teologtar daıyndaý kerek. Sebebi, qazir teolog maman tapshy. Mektepterde dinı kıimder kııýge de tyıym salǵan jón», - dedi Berdibek Saparbaev.
