Saparbaev pen Kólginov elimizdegi jalǵyz Paralımpıadalyq jattyǵý ortalyǵyna bardy
NUR-SULTAN. QazAqparat - Búgin QR Premer-Mınıstriniń orynbasary Berdibek Saparbaev pen Nur-Sultan qalasynyń ákimi Altaı Kólginov Paralımpıadalyq jattyǵý ortalyǵyna bardy, dep habarlaıdy QazAqparat tilshisi.
Vıtse-premer men qala basshysy Ulttyq paralımpıada komıteti men Paralımpıadalyq jattyǵý ortalyǵynyń jumysymen tanysty. Olar ortalyqtyń jattyǵý zalyn, voleıbol, ústel tennısi, jekpe-jek alańdaryn aralap, sportshylardy jattyqtyrýǵa arnalǵan jańa qural-jabdyqtardy kórip shyqty.
Qazaqstan Respýblıkasynyń Ulttyq paralımpıadalyq komıteti kommertsııalyq emes úkimettik emes uıym jáne Halyqaralyq paralımpıadalyq komıtettiń múshesi sanalady. UPK - qazaqstandyq sportshylardyń halyqaralyq jarystarǵa, sonyń ishinde Paralımpıadalyq oıyndarǵa qatysatyndyǵy týraly málimdeýge quqyǵy bar Qazaqstandaǵy jalǵyz ókili.
Qazaqstandaǵy alǵashqy paralımpıadalyq ortalyq - bul ulttyq quramalardy sapaly jáne kásibı daıarlaýǵa arnalǵan biregeı ǵımarat. Munda erekshe qajettilikteri bar adamdarǵa qajet barlyq nárse bar: sportpen shuǵyldanýǵa arnalǵan jabdyqtar, arnaıy sport zaldary, dárigerler, massajıstter, pandýstar, úsh tilde (qazaq, orys jáne aǵylshyn) sálemdesý, taktıldi jabyn taqtaıshalary, kireberis esikterin avtomatty túrde ashatyn jáne jabatyn batyrma jáne basqalar. Ortalyqta kúnine 780 adamǵa deıin sportpen tegin shuǵyldanýǵa múmkindik qarastyrylǵan.
