Saparbaev orynbasarlary men aýdan ákimderiniń jumysyna qanaǵattanbady
AQTÓBE. QazAqparat - Aqtóbede 2017 jyldyń áleýmettik-ekonomıkalyq damý kórsetkishi qorytyndylandy. Oblys ákimi B.Saparbaev bólingen qarjyny tolyq ıgermegen, bıýdjet túsimin arttyrýdy qamtamasyz ete almaǵan orynbasarlary men aýdan ákimderiniń jumysyna «nashar» dep baǵa qoıdy, dep habarlaıdy QazAqparat tilshisi.
Aqtóbede ónerkásip óndirisiniń kólemi 5 paıyzǵa artyp, 1,5 trıllıon teńgeni qurady. Onyń ishinde óńdeý ónerkásibi 7,9 paıyzǵa artty. Salyq túsimi 472,6 mıllıard teńge boldy. Degenmen qarjyny tolyq ıgere almaı, bıýdjetke keri qaıtarǵandar men óndiris ósimin qamtamasyz ete almaǵan aýdandar bar. Aqtóbe oblysynyń ákimi Berdibek Saparbaev ótken jyldyń qorytyndysyn tyńdap, kemshilikterge jol bergen orynbasarlary men qala, aýdan ákimderiniń jumysyn synady.
«Áıteke bı, Qarǵaly aýdandarynyń kórsetkishi nashar. Áıteke bı aýdany 2017 jyldyń sońynda áleýmettik-ekonomıkalyq kórsetkishter oń bolady dep esep bergen bolatyn. «Týǵan jerge taǵzym» aktsııasy aıasynda da jumys nashar júrip jatyr. 2017 jyly Áıteke bı aýdanynda birde-bir bilim, mádenıet, densaýlyq saqtaý nysany salynbady. Jańa ákim kelgen soń aýdannyń kórsetkishi tómendedi. Bir sózben aıtqanda, aýdannyń jumysy nashar»,- dedi Aqtóbe oblysynyń ákimi Berdibek Saparbaev. 
Áıteke bı aýdanynyń ákimi Málimbet Ibrashev 2016 jyly jańadan taǵaıyndalyp, mınıstrliktegi jumysyn tastap, aýdanǵa kelgen bolatyn. Ol kórsetkishterdiń tómendeý sebebin túsindirdi.
«Taý-ken óndirisinde qıyndyqtar bar. Sebebi, mys kompanııasy jumysyn toqtatyp, bir óndiris orny iske qosyldy. Bıyl kórsetkish oń bolady. Investıtsııa tartý kórsetkishi 85 paıyzdy qurady. Meje oryndalmady. Al «Týǵan jerge taǵzym» aktsııasy aıasynda 111 mıllıon teńgege sporttyq nysan salý jospary bar»,- dedi aýdan ákimi Málimbet Ibrashev.
Jyl qorytyndysy kezinde Aqtóbe qalasynyń ákimi Іlııas Ispanovtyń da jumysyn tııanaqty atqara almaǵany belgili boldy.
«Aqtóbe qalasy boıynsha 1,4 mıllıard teńge ıgerilmeı qaldy. Kezinde «aqsha berseńizder bárin tolyq oryndaımyz» dep aıtqan edińizder, biraq oryndalmady. Investıtsııa tartý tapsyrmasy da tolyq iske aspady. Bar bolǵany 90 paıyz ǵana. Óte nashar. Aqtóbe qalasy ınvestıtsııaǵa qol jetkize almasa, aqsha basqa qaıda keledi?»,- dedi B.Saparbaev.
Sonymen qatar, Hromtaý aýdanynda zaýytqa arnalǵan gaz qubyryn tartýǵa aqsha surap, ony ıgere almaı, bıýdjetke keri qaıtardy. Jıyn kezinde Aqtóbe oblystyq dene shynyqtyrý jáne sport basqamasy da qarjyny ıgermegeni belgili boldy.
«Basqa óńir sportqa aqsha taba almaıdy, al bizde ıgerilmeı qalǵan. Eset batyr atyndaǵy sportta daryndy balalarǵa arnalǵan mektep-ınternattyń jóndeý jumysy tolyq oryndalmady. Memlekettik satyp alý barlyq basqarmada bar, tek sport basqarmasy qıyndyqqa tap bolǵan»,- dedi B.Saparbaev.
Aqtóbe oblysynyń ákimi Berdibek Saparbaev ınvestıtsııalyq jobalarǵa, óndiris pen jalpy ekonomıkaǵa jaýapty Asqar Bıahmetovtyń, shaǵyn jáne orta bıznes pen óndiristi modernızatsııalaýǵa jaýapty Qaırat Bekenovtiń jumysyn synap, «nashar» dep baǵa berdi.
