Saparbaev óńirge jańa ınvestorlardy tartýdy tapsyrdy
AQTÓBE. QazAqparat - Aqtóbe oblysynyń ákimi Berdibek Saparbaev óńirge jańa ınvestorlardyń tartýdy tapsyrdy. Bul týraly oblys ákiminiń baspasóz qyzmeti málimdedi, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev shet el ınvestorlaryn tartý jóninde jıyn ótkizdi. Jyl basynan beri ınvestıtsııa tartý kórsetkishi 121,1% jetken. «KAZAKH INVEST» UK» AQ aımaqtyq ókildiginiń dırektory Marat Balmuhanovtyń aıtýynsha, qazir ınvestorlar úshin arnaıy saıt ázirlenip jatyr. Aqparattyq portalda Aqtóbeniń jobalary tizilip, jergilikti jerde tabysty jumys istep turǵan ınvestorlar týraly málimet jınaqtalady. Sonymen qatar, óndiris alańdary, ınvestorlarmen kezdesý, ótinishter týraly derekter saqtalady. Jańa aqparattyq portal jeltoqsanda iske qosylýy tıis. Bul - ınvestorlardy tartýdyń bir joly.
«Óńirde jumys istep kele jatqan ınvestorlarmen baılanys jaqsy, olar jańa ınvestıtsııa ákelip jatyr. Biraq bizdiń mindetimiz - jańa ınvestıtsııalyq kompanııalardy tartý», - dedi oblys ákimi Berdibek Saparbaev.
Aıta keteıik, jıyn kezinde óńir basshysy Berdibek Saparbaev orynbasary Qaırat Bekenovke jumysty jandyrýdy, únemi baqylaýda ustaýdy tapsyrdy. Birer aıdan soń naqty usynystar bolý tıis. Negizinen óńirdiń ınvestıtsııalyq áleýeti joǵary. Aqtóbe ındýstrııalyq aımaǵynda gaz, jaryq, sý jelisi tartylǵan, temirjolmen qamtamasyz etilgen.
Memleket jerdi tegin beredi. Esesine ınvestor qarjy salyp, jedel qurylys jumystaryn bastaýy kerek. Zaýyttar salýǵa arnalǵan arnaıy qujat bir tereze tártibimen iske asyrylady. Qazir munda kólik dońǵalaqtarynan jasandy jabyndy shyǵaratyn zaýyt, antıfrız óndiretin shaǵyn kompanııa jumys istep tur. Qysh taqtaıshalaryn shyǵaratyn zaýyt qurylys jumystaryn bastady. Buǵan deıin habarlaǵanymyzdaı, ındýstrııaldy aımaqta 13 joba iske asyrylyp jatyr.
