Saparbaev óńirde saılaýǵa daıyndyq boıynsha atqarylyp jatqan jumystardy synady
Kezdesýde Jambyl oblysynyń ákimi Berdibek Saparbaev aldaǵy máslıhattar saılaýy alǵash ret partııalyq tizim boıynsha ótkeli otyrǵandyǵyn atap ótti.
Oblystyq aýmaqtyq saılaý komıssııasynyń tóraǵasy Serǵalı Aıdapkelovtiń aıtýynsha, barlyq deńgeıdegi máslıhattar úshin 51 partııalyq tizim anyqtalyp, oǵan 523 kandıdat engen. Úmitkerlerdiń jalpy sanynyń 43,8 paıyzyn názik jandar men 29 jasqa deıingi jastar quraıdy. S.Aıdapkelov jekelegen saılaý rásimderine, atap aıqanda úmitkerlerdi usyný jáne tirkeý, saılaýaldy úgit-nasıhat jumystarynyń merzimine toqtalyp ótti.
«Máslıhattarǵa kandıdattardy usyný 10 jeltoqsan kúni saǵat 18:00-de aıaqtalady. Sol kúni saǵat 18:00-den keıin úgit-nasıhat naýqany bastalady, ol 2021 jyly 9 qańtar kúni saǵat 12-de aıaqtalady. Aýdandarda azamattardyń saılaý quqyqtaryn, saılaý naýqanynyń negizgi kezeńderin túsindiretin, daýys berýge qatysýǵa shaqyratyn bılbordtar, bannerler ornatý qajet dep sanaımyn», — dep atap ótti ol.
Óńir basshysy aýdan ákimderine tıisti tapsyrmany júktedi. Ol bul aqparattardyń baspa buqaralyq aqparat quraladary betterinde jáne ınternet jelilerinde de jarııalaný kerektigin alǵa tartty. Berdibek Saparbaev aýdan ákimderiniń saılaýǵa daıyndyq jumystaryn synǵa aldy.
«Saılaýshylardyń tizimi tolyǵymen qalyptaspaǵan. Jergilikti jerlerde túgendeý jumystaryn júrgizý kerek», — dep talap etti oblys ákimi.
Taǵy bir mańyzdy másele – saılaý ýchaskeleriniń materıaldyq-tehnıkalyq bazasy. Taraz jáne birqatar aýdanda ýchaskelerdiń bári birdeı ınternetpen, beınebaqylaý kameralarymen, pandýstarmen qamtylmaǵan.
«Eger oblys ortalyǵyndaǵy saılaý ýchaskeleri 100% daıyn bolmasa, onda aýdandar týraly ne aıtýǵa bolady? Úsh jaǵdaı boıynsha da Qordaı aýdany artta qalyp otyr. Shý jáne T.Rysqulov aýdandaryndaǵy jaǵdaı da kóńil kónshitpeıdi. Barynsha qysqa ýaqytta osy olqylyqtardyń barlyǵyn joıý qajet jáne múmkindigi shekteýli jambyldyqtardyń saılaý quqyǵyn qamtamasyz etýge erekshe nazar aýdarý kerek», - dep buıyrdy aımaq basshysy.
Jambyl oblysy boıynsha sanıtarlyq-epıdemıologııalyq baqylaý departamenti basshysynyń mindetin atqarýshy Neılıa Mýlıkova qazir saılaý ýchaskeleriniń sanıtarlyq talaptarǵa sáıkestigi tekserilip jatqandyǵyn aıtty.
«Karantın shekteýleri azamattardyń el Konstıtýtsııasynda kepildendirilgen daýys berý quqyǵyn júzege asyrýyna kedergi bolmaýy tıis. Degenmen saılaýshylar, komıssııa músheleri men baqylaýshylar sanıtarlyq normalardy qatań saqtaýy kerek. Ol úshin aýdandarda qajetti jaǵdaılar jasalynýy qajet», — dedi oblys ákimi.
Sondaı-aq, shtab músheleri ár saılaý ýchaskesinde medıtsınalyq beketter ashý, em alyp jatqan naýqastardyń daýys berýine qatysty máselelerdi talqylady. Polıtsııa departamentiniń bastyǵy Janat Súleımenov saılaý kezinde myńnan astam polıtseı zańdylyq pen tártiptiń saqtalýyn qamtamasyz etetinin jetkizdi.