Saparbaev ómirlik qıyn jaǵdaıdaǵy balalardy qoldaý ortalyǵyndaǵy balalarmen kezdesti
TARAZ. QazAqparat – Halyqaralyq balalardy qorǵaý kúni merekesine oraı Jambyl oblysynyń ákimi Berdibek Saparbaev ómirlik qıyn jaǵdaıdaǵy balalardy qoldaý ortalyǵynda bolyp, ondaǵy tárbıelenýshilerine arnaıy baryp, quttyqtap qaıtty,- dep habarlaıdy QazAqparat tilshisi.
Oblys basshysyn qýanyshpen qarsy alǵan ortalyq tárbıelenýshileri nysannyń barlyq bólmelerin birge aralap, jańalyqtarymen bólisti. Bul kúni ortalyqta «Meıirim» jobasy aıasynda «Meıirim» otbasy ashylyp, onyń lentasyn aımaq basshysy Berdibek Saparbaev pen Jambyl oblysynyń sýdıasy Erbol Ulataıuly qıdy. Atalmysh otbasynyń arnaıy bólmelerin oblystyq sot ujymy ádemi jıhazdarmen, kerekti buıymdarmen jabdyqtapty. Oblys ákimi saýapty iske atsalysqan azamattarǵa óz alǵysyn bildirdi.
Qonaqtar shara barysynda balalardy kásipke beıimdeý kabınetterimen tanysty. Jańadan ashylǵan «Brıllıant» sulýlyq salonynda ortalyqtyń qyzdary shash qııý, tyrnaq, bet árleýmen aınalysady. Jeke kásipkerdik demeýshiligimen jasalǵan salonda qyzdar bet árleý, manıkıýr jasaýǵa arnaıy kýrstardy oqyp, mashyqtanypty. Budan soń ózderine arnaıy kelgen meımandardy balalar «Gaýhartas» aspazdyq stýdııasy kabınetin kórýge shaqyrdy. Aspazdyq stýdııasy da jeke kásipkerdiń demeýshiligimen tolyqtaı jabdyqtalypty. Munda balalar óz qoldarymen jasaǵan dámnen aýyz tııýdi usyndy. Qonaqtar ary qaraı «Balalyq shaqtyń shýaqty qalasy» atty merekelik kontsertti tamashalady.
Saltanatty kontsert sıýjettik bımen ashylady. Onda búldirshinder «Skazochnyı mır» bıin bılep, kórermenderdi bir serpiltti. Munan soń qoldaryna gıtara aspabyn ustaǵan ánshi balaqaılar, «16 qyz» ánin oryndady. Ánshilerdi qazaqsha kıim men bı bılegen 16 qyz demep, myń qubyla bıledi. Balalardyń merekelik kontserttik baǵdarlamasyn tamashalaǵan aımaq basshysy Berdibek Saparbaev, sahnaǵa shyǵyp, búldirshinderge aq tilegin arnady.
«Qymbatty balalar! Sizderdi Halyqaralyq balalardy qorǵaý kúnimen shyn júrekten quttyqtaımyn! Bul mereke ataýly halyqaralyq merekelerdiń biri retinde dúnıe júzinde atalyp ótýde. Bul senderge kóterińki kóńil-kúı syılap, tilekterińdi nazarsyz qaldyrmaıtyn kún. Óıtkeni elimizdiń erteńgi tiregi- búgingi osy búldirshinder. Sondyqtan da, jas urpaqqa sanaly tárbıe, sapaly bilim, jarqyn bolashaq syılaý memleket qamqorlyǵyna alynǵan. Balalar bizdiń bolashaǵymyz. Búldirshinderdiń júzinen kúlki ketpeı, júrektenrinen jylýy ketpeıtindeı jaǵdaı jasaý – bizdiń boryshymyz»,-dedi Berdibek Saparbaev.
Balalar merekesine arnaıy kelip, aqjarma tilegin arnaǵan oblys basshysyna ortalyq tárbıelenýshileri óz qoldarymen jasaǵan buıymyn syılady. Munan soń sóz alǵan ortalyq dırektory Aıjan Dúkenbaeva da, oblys basshylaryna raqmetin aıtyp, demeýshi bolyp, qol ushyn usynǵan azamattarǵa alǵysyn jetkizdi.
Aıta keteıik, qara shańyraqta búginde 111 bala ósip jatyr. Olardyń ár qaısysy túrli ulttan bolǵanymen qazaq, orys tilderinde bilim alady. Balalar ata-ana qamqorynan qaǵylǵanmen, bul ortalyqta arnaıy otbasylyq negizde tárbıelenedi.
