Saparbaev oqýshylarǵa: «Blat» degen túsinik qalǵan, bastysy - bilimdi bolý
NUR-SULTAN. QazAqparat – Úkimet basshysynyń orynbasary Berdibek Saparbaev oqýshylarǵa tálim bolar oılarymen bólisti, dep habarlaıdy QazAqparat tilshisi.
«Búgin sizderdiń mektepterińizge qala ákimi Altaı Seıdirulymen kelgen maqsatymyz – aǵalyq, ákelik boryshymyzdy aıtý. Eń negizgi aıtar másele: jańa maǵan bul zalda 10-11 synyptyń balalary otyr dep aıtty. Qazirgi ýaqytta zaman talabyna saı bilim alýǵa barlyq múmkindik bar. Mektepterińizdi qarańyzdar. Qanshama baǵdarlama bar. Burynǵynyń bárin qoıý kerek. Blatpen túsedi, anaý-mynaý degendeı. Qazir bir-aq nárse bar – basyń isteýi kerek. Sonda ǵana Amerıkaǵa da, Eýropaǵa da baryp oqı alasyń – eshqandaı másele joq. Myna otyrǵan aǵalaryń – Nur-Sultan qalasynyń ákimi Altaı Seıdiruly aýyldyń kópbalaly otbasynan shyqqan. Jaqsy oqyǵanynyń arqasynda «Bolashaq» baǵdarlamasymen oqyp, qyzmet istep júr», - dedi elordadaǵy №76 mektep-lıtseıde oqýshylardyń aldynda sóz sóılegen Berdibek Saparbaev.
Mektepte ótip jatqan ekologııalyq saǵatqa qatysqan Úkimet basshysy óz sózinde balalarǵa barlyǵy bilimge baılanysty ekenin atap ótti.
«Ýaqytty jiberip almaý kerek. Jańa mekteptiń dırektorynan qansha úıirme baryn surap otyrmyn. Adamnyń densaýlyǵy myqty bolýy kerek. Ol úshin sportpen aınalysý kerek. Adamnyń mádenıeti joǵary bolý úshin óner salasyna barýy tıis. Sondyqtan, biz sizderden sol múmkindikti durys paıdalanýdy suraımyz», - dedi Premer-Mınıstrdiń orynbasary.
Eske sala ketsek, Úkimet basshysynyń orynbasary Berdibek Saparbaev pen Nur-Sultan qalasynyń ákimi Altaı Kólginov elordadaǵy №76 mektep-lıtseıde ótken ekologııalyq saǵatqa qatysyp, mektep aýlasyna aǵash otyrǵyzǵan bolatyn.
