Saparbaev oqýshy ólimi bolǵan aýdandyq mektepte ata-analarmen kezdesti
AQTÓBE. QazAqparat - Aqtóbe oblysynyń ákimi Berdibek Saparbaev oqýshy ólimi bolǵan Shalqar aýdanyna baryp, balalardyń ata-analarymen kezdesti, dep habarlaıdy QazAqparat tilshisi.
Shalqar aýdanynda bıylǵy qańtar aıynyń sońynda pyshaq jaraqatynan jasóspirim kóz jumdy. Osy oqıǵadan keıin mektepterge metall izdeıtin qurylǵy qondyrylyp, kúzetti arnaıy mekemege berý qolǵa alyndy.
6 aqpan kúni oblys ákimi Shalqar aýdanyna jumys saparymen baryp, ata-analarmen kezdesý ótkizdi. Jıynǵa mektep dırektorlary, ata-analar komıtetiniń ókilderi, mektep psıhologtary men ardager ustazdar shaqyryldy.
«Ókinishke qaraı, oqýshylar tóbelesip, sońy qaıǵyly aıaqtaldy. Sonyń biri Shalqar aýdanynda boldy. Balalar nege burys jolǵa tústi, olardy durys jolǵa salý úshin ne isteý kerek? Osy suraq talqylanýy tıis», - dedi óńir basshysy.
Bala tárbıesinde ata-ana, memleket, qoǵam birlese jumys isteýi kerek. «Eger ata-ana, muǵalim, mektep ınspektory oqýshy boıyndaǵy ózgeristi der kezinde kóre alsa, ańǵarsa, qaıǵyly oqıǵanyń aldyn alýǵa bolatyn edi», - degen oıyn bildirdi B.Saparbaev.
Oblys ákiminiń aıtýynsha, balalar tárbıesine durys kóńil bólmegender jaýapkershilikke tartylýy tıis.
«Oqýshy bir mezette qolyna pyshaq alyp, bireýdi jaralaı almaıdy. Usaq buzaqylyq jasaıdy, tóbelesedi, aıtqandy tyńdamaıtyn tentek bolady, minezi ózgeredi. Dál osy ózgeris bolsa mektep psıhology, ınspektor, sotsıolog jumys isteýi tıis. Ata-ana da beıjaı qalmaýy qajet. Al eshkim mán bermese, jazalansyn. Sebebi, jaýapkershilik bolýy kerek», - dedi ol.
Jıyn kezinde tárbıe jumysyn kúsheıtip, jastardy sport, mádenıet, bilim berý nysandarymen qamtamasyz etýge tapsyrma berildi.
Aıta keteıik, sońǵy ýaqytta Aqtóbe oblysynda oqýshylardyń, stýdentterdiń arasyndaǵy tóbeles jıi oryn alýda.
