Saparbaev múgedek balasy bar jalǵyzbasty ananyń shaqyrýyn qabyl aldy
Aqtóbe qalasy, Zarechnyı-2 eldi mekeni, Vostochnaıa kóshesi. Bul jerde ótken ǵasyrda salynǵan eki qabatty kóppáterli turǵyn úı bar. Kóz kórmeıtin, aınalyp júretin adam ǵana biletin mekenge búgin oblys ákimi Berdibek Saparbaev bardy. Keshe óńir basshysynyń esebine baryp, turmystyq jaǵdaıymen tanysýdy ótingen 35 jastaǵy jalǵyzbasty ana Gúlmıra Esbergenovanyń bir tilegi oryndaldy. Munda gaz qubyry tartylǵanymen, qaltasynda qarjysy bar, áli keletin adamdar ǵana úıin jylytyp otyr. Ózgesi mynadaı toq peshtermen boıyn jylytyp otyr.
«2000 jyldardyń basynda Qyzylorda oblysynan kóship kelip, Aqtóbe qalasyndaǵy turǵyn úı qoryn esepke alý sektoryndaǵy «Tolyq emes otbasy», «Múgedek balasy bar otbasy» sanaty boıynsha páter kezegine turdym. Qazir 147-shi bolyp kezekte turmyn. Bir jylda shamamen 6-7 adam páter alsa, meniń kezegim taıaýdaǵy onjyldyqta jyljymaıtyny anyq. Al qyzym Inabat jyl saıyn ósip keledi. Jýynatyn jeri joq, ájethanasy bir bólme ishinde. Bir kúni qyzymdy arqalap baspaldaqtan túspek boldym. Qulap, súıegi shytynap ketti. Bir aı boıy tósekke tańylyp, gıpspen jatty», - dedi Gúlmıra Esbergenova.
Esbergenovalarǵa ýaqytsha baspana 2012 jyldyń kókteminde berilgen. Jylý júıesi tartylmaǵan soń páter ishin syz basqan. Munda sý joq. Syrttan tasyp ishedi. Kóktem kele qar erip, tóbedegi sý ishke kirip jatyr.
«Sońǵy 3-4 jylda múgedekterge arnalǵan birde-bir úı salynbady. Qazirgi zańǵa sáıkes, baspanaǵa muqtaj adamdar tek óz kezegimen úı ala alady. Nesıege, «Turǵyn úı qurylys jınaq bankinen» esepshot ashyp, qarjy jınap, baspanaly bolý joldary bar. Bul joldarǵa sizdiń jaǵdaıyńyz kelmeıdi. Qala ákimi Іlııas Ispanovqa demeýshiler taýyp, kómek kórsetýdi, qalalyq jumyspen qamtý jáne áleýmettik baǵdarlamalar bólimine 8 naýryzǵa oraı áleýmettik qarjylaı kómek berýdi tapsyramyn», - dedi oblys ákimi Berdibek Saparbaev.
Aıta keteıik, Inabat jylyna bir ret memleket tarapynan em alýǵa baryp turady. Munan ózge anasy toqsan saıyn reseılik dárigerdiń qabyldaýyna barady. Ár em - 170 myń teńge. Nátıje bar. Inabat kóz janarymen ymdaı alady. Sózderdi túsinedi, erkeleıdi.
«Múgedek balany baǵyp otyrǵan soń aıyna 59 myń teńge alamyn. Buryn em úshin nesıe alǵanmyn, aıyna 44 myń teńge tólep otyrmyn. Úıimiz toqpen jylytylyp, bar qarjy kommýnaldyq tólemnen aspaıdy. Tamaq alý úshin ata-anam kómektesedi», - dedi G.Esbergenova.
Esbergenovalar Reseıdegi em úshin qaıyrymdy jandardyń, «Júrekten júrekke» atty qaıyrymdylyq qorynyń qarjysyn jaratyp júr. Bul otbasy úshin búgin bir úmit oty oıandy. Olar turmys jaǵdaıyn qarap, qamqor bolýǵa ýáde bergen Saparbaev tapsyrmasynyń oryndalaryna senedi. 
