Saparbaev: Mindetimiz — bıyl keminde 350 myń otbasyn jumyspen qamtý

NUR-SULTAN. QazAqparat - Bıyl eń keminde 350 myń otbasy jumyspen qamtamasyz etiletin bolady. Bul týraly búgin Úkimet otyrysynda QR Premer-Mınıstriniń orynbasary Berdibek Saparbaev aıtty, dep habarlaıdy QazAqparat tilshisi.

«Memleket basshysynyń áleýmettik salada bergen tapsyrmalary qabyldanǵan is-sharalarǵa sáıkes júrgiziledi. Eń birinshi ataýly áleýmettik kómek kem degende 200 myń muqtaj otbasyna, 600 myń balaǵa tólenetin bolady. Mindet osy jyly 350 myń otbasyn jumyspen qamtamasyz etý», - dedi Berdibek Saparbaev.

Sonymen qatar, ol mindetti medıtsınalyq saqtandyrý engizý boıynsha aqparattardy ózektendirý, esepke alý, turǵyndardyń mártebesin anyqtaý jumystary jalǵasyn tabady. Barlyq óńirde qurylǵan jumys toptary, shtabtar osy jumyspen aınalysady.

«Keshe sizdiń tapsyrmańyzǵa sáıkes barlyq oblys ákimderiniń orynbasarlarymen, basqarma basshylarymen osy jóninde selektorlyq májilis ótkizildi. Onda taǵy tapsyrma berildi. Ásirese túsindirý, der kezinde málimet, aqparat berý qatań tapsyryldy. Zeınetaqy júıesin reformalaý tapsyrmasyna sáıkes 24 qańtarda jumys tobynyń kezekti otyrysy boldy. Onda jol kartasyn qabyldaý jóninde tapsyrma berildi», - dedi Berdibek Saparbaev.