Saparbaev Merki-Býrylbaıtal avtojolynyń qurylysyn kelesi jyly aıaqtaýdy tapsyrdy
TARAZ. QazAqparat – Jambyl oblysynyń ákimi Berdibek Saparbaev Merki-Býrylbaıtal respýblıkalyq avtojolynyń qurylysyn 2021 jyly aıaqtaýdy tapsyrdy, dep habarlaıdy QazAqparat oblys ákiminiń baspasóz qyzmetine silteme jasap.
Ol týraly oblys ákimdiginde ótken apparattyq keńeste aıtyldy. Basqosý barysynda «Qazavtojol» ulttyq kompanııasy fılıalynyń dırektory Ómirzaq Erembaevtyń aıtýynsha, aǵymdaǵy jyly Merke-Býrylbaıtal respýblıkalyq avtojolynyń bir baǵyty boıynsha qurylysy aıaqtalmaq. Al, jol qurylysy tolyǵymen 2022 jyly tapsyrylýy tıis.
«Uzyndyǵy 266 shaqyrym jol salý úshin bes jyl degen óte uzaq merzim. Bul joldy 2021 jyly aıaqtaý kerek. Eń bastysy – qurylys barysynda qarjyny ýaqytyly ıgerý, joǵary sapaǵa mán berý, jergilikti materıaldardy paıdalaný, jumys oryndaryn qurý jáne jumysshylardyń jalaqysyn kidirissiz tólep otyrý», - dedi Berdibek Saparbaev.
Jıynda oblys ortalyǵyndaǵy joldardyń jaıy da nazarǵa alynyp, Berdibek Saparbaev birinshi kezekte Abaı men Qoıgeldi kóshelerin retke keltirýdi tapsyrdy.
Energetıka jáne TKSh basqarmasynyń basshysy Nurlan Aldamjarovtyń aıtýynsha, Abaı kóshesindegi joldy jóndeý jumystary aǵymdaǵy jyldyń 1 mamyryna deıin, Qoıgeldi kóshesindegi jumystar 20 mamyrǵa deıin aıaqtalmaq.
