Saparbaev memlekettik baǵdarlamany oryndaýǵa selqos qaraǵan óńirlerdi atady
NUR-SULTAN. QazAqparat - «Eńbek» memlekettik baǵdarlamasyn keıbir óńirler durys júzege asyryp otyrǵan joq. Bul týraly búgin Úkimet otyrysynda QR Premer-Mınıstriniń orynbasary Berdibek Saparbaev aıtty, dep habarlaıdy QazAqparat tilshisi.
«Óńirlerdi aralaǵanda, Parlament qabyrǵasynda bolǵanymyzda, baıqaǵanymyz turǵyndardy eń negizgi tolǵandyratyn másele – jumyspen qamtý. Búgin qaralyp otyrǵan »Eńbek« memlekettik baǵdarlamasynyń eń negizgi mindeti – birinshiden oqytý, ekinshiden - kásipke úıretý, úshinshiden -jumysqa ornalastyrý. Osyny baıqaý úshin bıyl barlyq memlekettik baǵdarlamaǵa qansha jumys orny ashylǵandyǵy týraly ındıkator engizdik», - dedi ol.
Onyń aıtýynsha, bıyl arnaıy aqparattyq júıe jasalǵan. Atalǵan júıe arqyly árbir memlekettik baǵdarlama boıynsha qansha jumys orny ashylǵanyn baıqap otyrýǵa bolady. Sonymen qatar ol taıaýda baǵdarlamanyń 9 aıdaǵy qorytyndysy qaralǵanyn eske saldy.
«Ókinishke qaraı, keıbir óńirler berilgen tapsyrmany nashar oryndaǵan. Mysaly, «Bıznes bastaý» baǵdarlamasynyń oryndalýy Almaty qalasynda - 37, Shymkentte – 26, Nur-Sultanda 6-aq paıyz. Berilgen granttar sany men granttardy ıgerý boıynsha Túrkistanda - 15, Shymkentte - 4, Nur-Sultanda 23 paıyz. Shaǵyn nesıeni ıgerý boıynsha Mańǵystaýda – 42 , Shymkentte – 41, Nur-Sultanda 49 paıyz. Eki aı ǵana ýaqyt qaldy. Osyǵan oraı óńir basshylaryna tapsyrma berseńiz. Birinshiden, tapsyrylǵan jumys oryndary ashylýy kerek. Ekinshiden berilgen granttar, nesıeler tolyq ıgerilýi tıis«, - dedi Berdibek Saparbaev el Úkimetiniń basshysy Asqar Mamınge qaıyrylyp.
