Saparbaev maýsymdaǵy lańkestik oqıǵa kezinde qaza bolǵan azamattardyń anasy men jubaıyn quttyqtady
AQTÓBE. QazAqparat - Aqtóbe oblysynyń ákimi Berdibek Saparbaev maýsymdaǵy lańkestik oqıǵa kezinde qaza bolǵan azamattardyń anasy men jubaıyn Halyqaralyq áıelder kúni quttyqtady, dep habarlaıdy QazAqparat tilshisi.
8 naýryz Halyqaralyq áıelder kúnine oraı quttyqtaýlar bastaldy. Búgin oblys ákimi Berdibek Saparbaev 5 maýsym kúni lańkesterdiń qolynan qaza bolǵan zeınetker Nıkolaı Onışenkonyń jubaıy Galına Onışenkony, Andreı Maksımenkonyń anasy Tamara Maksımenkony, Mıhaıl Matrosovtyń jubaıy Svetlana Matrosovany merekemen quttyqtady.
«Sizderge eń bastysy densaýlyq tileımiz. Jaqynyńnan aıyrylý qıyn, biraq ómir jalǵasady. Balalaryńyz ben nemerelerińiz úshin bárine shydas bergen jón. Bılik jat aǵym jeteginde ketkendermen kúres jumystaryn jan-jaqty júrgizip jatyr. Bul jumys ári qaraı jalǵasady, toqtamaıdy», - dedi oblys ákimi Berdibek Saparbaev.
Aıta keteıik, 5 maýsymdaǵy lańkestik oqıǵa kezinde «Pallada» men «Pantera» qarý-jaraq dúkenderinde atys bolyp, úsh beıbit turǵyn men «Kúzet» mekemesinde jumys isteıtin Meıirhan Tájibaev qaıtys boldy. Sol kezde Aqtóbedegi 6655 áskerı bóliminde 3 áskerı qyzmetker oqqa ushty.
Lańkestik oqıǵa kezinde qolyna qarý alyp, oq atqan 7 sottalýshy ómir boıy, ekeýi 20-22 jylǵa bas bostandyǵynan aıyryldy. Qylmysty jasyryp qalǵan 18 sottalýshyǵa 2 jyldan 5 jylǵa deıin bas bostandyqtarynan aıyrý jazasy kesildi.
