Saparbaev lıftide qaza bolǵan jýrnalıstiń týystaryna kóńil aıtty
AQTÓBE. QazAqparat - Aqtóbe oblysynyń ákimi Berdibek Saparbaev lıftidegi qaıǵyly oqıǵaǵa baılanysty tekserý júrgizýdi tapsyrdy. Bul týraly oblys ákiminiń baspasóz qyzmetine silteme jasap QazAqparat tilshisi habarlaıdy.
Aqtóbe oblysynyń ákimi Berdibek Saparbaevtyń tapsyrmasyna oraı, óńirde saraptama komıssııasy quryldy. Komıssııa kópqabatty úılerdegi lıftiniń tehnıkalyq jaǵdaıyn tekserip, qyzmet kórsetetin kompanııalardyń jumysyn qaraıdy.
«Qaıǵyly oqıǵa bárimizdi dúr silkindirdi. Biz mundaı jaǵdaı qaıtalanbaýy úshin barlyq sharany qolǵa alýymyz kerek. Aqtóbe qalasynyń ákimdigi, prokýratýra men memlekettik organdar birlesip, sanaýly kúnde barlyq lıftini tekserip, tehnıkalyq qyzmet kórsetý, jóndeý sapasyn qaraýy tıis. Sonymen qatar, basqarýshy kompanııalarda jumys isteıtin mamandardyń jumysyn, turǵyndardyń qaýipsizdigin qamtamasyz etý mindetiniń oryndalýyn baqylaýǵa alǵan jón»,- dedi oblys ákimi Berdibek Saparbaev.
Aıta keteıik, komıssııa quramyna turǵyn úı-kommýnaldyq sharýashylyq basqarmasynyń ókilderi, tótenshe jaǵdaılar qyzmeti men ónerkásiptik qaýipsizdik departamenti jáne birneshe sarapshylar bar. Al quqyq qorǵaý organdaryna oqıǵanyń mán-jaıyn anyqtaý, kináli adamdardy tabý tapsyryldy.
Baspasóz qyzmetiniń habarlaýynsha, óńir basshysy Berdibek Saparbaev qaza bolǵan Aızat Ábdisamattyń otbasyna, týǵan-týystaryna kóńil aıtty.
