Saparbaev qytaılyq kompanııa basshylaryna zańdy qatań saqtaýdy eskertti
TARAZ. QazAqparat – Qazaqstanda bıznestiń áleýmettik jaýapkershiligi degen uǵym bar. Jambyl oblysynyń ákimi Berdibek Saparbaev jol qurylysyna jumyldyrylǵan qytaılyq kompanııa basshylarymen kezdesýinde osylaı aıtyp, olardy áleýmettik máselelerdiń sheshimine atsalysýǵa shaqyrdy, dep habarlaıdy QazAqparat.
Berdibek Saparbaevtyń Shý aýdanyna jumys sapary barysynda jol máselelerine basa mán berildi. Aýdan aýmaǵynda uzyndyǵy 262 shaqyrym bolatyn Merki-Býrylbaıtal avtojolyn qaıta jańǵyrtý boıynsha aýqymdy joba júzege asyrylýda. Oblys ákimi qurylysy júrip jatqan aýmaqtarda bolyp, jol-qurylys kompanııalarynyń basshylarymen kezdesti.
Іri jobaǵa qytaılyq «China Xinxin Corporation» jáne qazaqstandyq «ABK-Avtodor NS» kompanııalary tartylǵan. Sonymen qatar, «Sinohydro Corp Limited» kompanııasy Balqash-Býrylbaıtal jolynyń 35,6 shaqyrymyn salýda. Al «Todini and SMS» birlesken kásiporny Kúrti-Býrylbaıtal trassasynyń 62 shaqyrymdyq aýmaǵynyń qurylysyn iske asyrýda. Oblys ákimimen bolǵan kezdesýge Uzynaǵash - Otar jolynyń qurylysyn atqaryp jatqan qazaqstandyq merdigerlik uıym «QazaqJolQurylys» ókilderi de qatysty. Aıta ketý kerek, atalǵan avtojoldyń 16 shaqyrymy Jambyl oblysy aýmaǵy arqyly ótedi.
Qazaq tilinde suhbattasqan Berdibek Saparbaevqa tilmash arqyly jaýap bergen qytaılyq merdigerlerge Qazaqstan zańdaryn qatań saqtaý kerektigi eskertildi. Sondaı-aq oblys ákimi qytaılyq kásiporyndardyń jalaqysy tómendigin alǵa tartyp, onyń kólemin jyl saıyn kem degende 10 paıyzǵa arttyryp otyrý kerektigin atap ótti. Budan bólek, barlyq jumysshylar úshin teń jaǵdaı jasaý kerektigin eske salyp, ásirese jalaqy, tamaqtaný jáne júrip-turý máselelerine kóńil bóldi.
B.Saparbaev mal ótkelderin salý jáne jol boıyndaǵy aryqtar men kópirlerdi jóndeý qajettigin basa aıtty. Jol jóndeý jumystary jaqyn mańda ornalasqan jergilikti turǵyndardyń 13 úıiniń qabyrǵalarynyń jarylýyna sebep bolǵan. Olardy 15 kúnnen keshiktirmeı jóndeý kerek. Bul úshin 8,5 mıllıon teńge qajet.
«Qazaqstanda bıznestiń áleýmettik jaýapkershiligi degen uǵym bar. Kompanııalar jaqyn mańdaǵy eldi mekenderge, oblys ortalyǵyna áleýmettik máselelerdi sheshýge kómek kórsetýi kerek. Ásirese, koronavırýs jaǵdaıyn eskere otyryp, jaǵdaıy tómen, kópbalaly otbasylarǵa kómektesý qajet.
Qazaqstan Respýblıkasynyń zańdary, onyń ishinde «Til týraly» Zańy qatań saqtalýy kerek. Memlekettik tilimiz – qazaq tili. Barlyq mańdaıshalar, onyń ishinde kireberiste ornalasqan kompanııanyń ataýy da qazaq tilinde bolýy kerek. Osynda qaıta kelip, tapsyrmalardyń qalaı oryndalǵanyn tekseremin», - dep atap ótti oblys ákimi.
Qytaı kompanııalarynyń jetekshileri Saparbaevtyń talaptaryna tolyqtaı kelisetindikterin bildirdi.
Merki-Býrylbaıtal jolynyń bir baǵytyn bıyl aıaqtaýǵa múmkindik bar ma? Merdigerler qurylysty tolyǵymen jospardan bir jyl buryn, ıaǵnı 2021 jyly aıaqtaı ala ma? Berdibek Saparbaev osy sekildi birqatar saýalyn qoıdy.
Bul máselelerde aımaq basshysy merdigerler tarapynan túsinistik tapty.
Talqylaý kórsetkendeı, jol salýshylardyń aldynda eshqandaı kedergiler kezdesip otyrǵan joq. «Todini and SMS» BK basshysy Moıynqum aýdany aýmaǵynda karerlerdi bólýge qol ushyn berýdi surady.
«Eń bastysy, barlyq jumystar ýaqtyly jáne sapaly atqarylýy kerek. Merki jáne Shý aýdandary arasyndaǵy joldyń bir baǵytynyń qurylysyn bıyl aıaqtaý kerek. Jol qurylysynda jergilikti materıaldar paıdalanylyp, al jergilikti adamdar jumyspen qamtylǵany mańyzdy. Jol salýshylar qazaqstandyq óndirýshilermen kelisimsharttar jasasyp, bıtým qoryn qalyptastyrý kerek...
Sonymen qatar, qazirgi jaǵdaıda, ásirese qurylysshylarǵa arnalǵan jataqhanalarda sanıtarlyq normalardy qatań saqtaý – basty talap bolyp tabylady. Adamdardyń densaýlyǵy bárinen mańyzdy», - dep túıindedi Berdibek Saparbaev.
Aıta keteıik, Jambyl oblysynyń ákimi apparat keńesinde Merki-Býrylbaıtal respýblıkalyq avtojolynyń qurylysyn kelesi jyly aıaqtaýdy tapsyrǵan bolatyn.
