Saparbaev Qordaıda quqyqtyq tártipti qamtamasyz etý sharalarymen tanysty
TARAZ. QazAqparat - Jambyl oblysynyń ákimi Berdibek Saparbaev Qordaı aýdanynda quqyqtyq tártiptiń qamtamasyz etilý jaǵdaıymen tanysty, dep habarlaıdy QazAqparat.
«Aımaq basshysy Qarakemer, Sortóbe, Masanshy, Qarasý jáne aýqatty aýyldaryndaǵy blok-beketterdiń jumysyn tekserip, aýdan turǵyndarynyń qaýipsizdigin qamtamasyz etetin quqyq qorǵaý organdarynyń jeke quramymen jáne Ulttyq gvardııanyń áskerı qyzmetshilerimen kezdesti», - delingen oblys ákimdiginiń áleýmettik jelidegi paraqshasynda.
Sondaı-aq, Berdibek Saparbaev memlekettik jáne quqyq qorǵaý organdary basshylarynyń qatysýymen tótenshe jaǵdaıdyń saldaryn joıý jónindegi oblystyq shtabtyń otyrysyn ótkizdi. Onda Qordaı aýdany aýmaǵynda turaqtylyq pen quqyqtyq tártipti qamtamasyz etý boıynsha tıisti tulǵalarǵa birqatar naqty tapsyrmalar júktedi.
Buǵan deıin habarlaǵanymyzdaı, oblys ákimi sondaı-aq Qordaı aýdanyndaǵy tártipsizdikterge qatysy bar degen kúdikpen ustalǵandardyń týystarymen kezdesti.
