Saparbaev kópbalaly analarǵa: Úıde otyryp-aq aqsha tabýǵa bolady
«Kópbalaly analar men múgedek balalardy tárbıelep otyrǵan analar úshin úıde áleýmettik jumys oryndaryn ashý uıymdastyrylady. Bul oraıda jergilikti ákimdiktermen jumys júrgizýdemiz. Úıde otyryp-aq qarjy tabýǵa bolady. Ol úshin áleýmettik jumys oryndaryn ashýmen birge, suranysqa ıe kásipterge qysqa merzimde oqytyp úıretetin kýrstar uıymdastyrylýy kerek», - dedi Berdibek Saparbaev.
Budan bólek, QR Eńbek jáne halyqty áleýmettik qorǵaý mınıstri áleýmettik sala qyzmetkerleriniń, onyń ishinde bilim berý men densaýlyq saqtaý salasynda jumys isteıtin adamdardyń jalaqysy kóteriletinin atap ótti.
«Halyqtyń ál-aýqatyn arttyratyn basty jaı - jalaqy mólsheri. 2019 jyldyń 1 maýsymynan bastap bilim berý salasyndaǵy qyzmetkerlerdiń tabysyn 30 protsentke deıin kóbeıtý kózdelip otyr. Mektepke deıingi uıymdardyń tárbıeshileri, olardyń kómekshileri, ınternat mekemeleriniń tárbıeshileri, ádiskerler, balabaqshalar men kolledjderdiń áleýmettik pedagogteri, psıhologtar, qosymsha bilim berý uıymdarynyń qyzmetkerleri, tehnıkalyq personaldyń jalaqylary joǵarydaǵy aıtylǵan mólsherde kóteriletin bolady», - dedi vedomstvo basshysy.
Sonymen qatar kezdesýde densaýlyq saqtaý uıymdary qyzmetkerleriniń de jalaqysyn 30 protsentke kóterý mejelenip otyrǵany aıtyldy. Qazir elimizde olardyń sany 29686-ny quraıdy. Búgingi tańdaǵy ortasha tabysy - 108 194 teńge. Kútiletin ortasha jalaqy mólsheri - 140 643 teńgege. Jalpy praktıka dárigerleriniń, terapevter men pedıatrlardyń, orta medıtsınalyq personaldyń, kishi jáne ózge de personaldardyń jalaqysy artady. Máselen, kishi personal osy ýaqytqa deıin shamamen 48 861 teńge alyp kelse, ol ústimizdegi jyldyń 1 maýsymynan bastap 63 520 teńgege kóteriledi.
Eske sala keteıik, búgin QR Premer-Mınıstriniń orynbasary Gúlshara Ábdiqalyqova bastaǵan Úkimet músheleri Aqmola oblysyna jumys saparymen keldi.
Halyqpen ótken kezdesýde Elbasy Nursultan Nazarbaevtyń «Nur Otan» partııasynyń HVІІІ sezinde aıtqan áleýmettik qoldaýdy kúsheıtý, halyqtyń ómir súrý sapasyn jaqsartý baǵytyndaǵy mindetteri túsindirildi.
