Saparbaev kommýnaldyq bazarlardy baqylaýdy tapsyrdy
AQTÓBE. QazAqparat - Kommýnaldyq bazarlardyń barlyǵy jumys isteýi kerek. Aqtóbe oblysy ákiminiń apparat qyzmetkerleri endi kún saıyn bazar jumysyn baqylaıtyn bolady, dep habarlaıdy QazAqparat tilshisi.
Halyqtyń áleýmettik osal tobyn arzan azyq-túlikpen qamtamasyz etýge baǵyttalǵan kommýnaldyq bazarlar turaqty jumys isteýi tıis. Aqtóbe oblysynyń ákimi Berdibek Saparbaev bazarlarǵa jaýapty «Aqtóbe» áleýmettik-kásipkerlik korporatsııasynyń jyldyq qorytyndysyn tyńdap, naqty tapsyrmalar berdi.
«Biz qarjy bólip, bazarlar ashtyq. Endigi mindet - turaqty jumys. Sizder tańerteń, keshke baqylaý júrgizesizder. Ekinshiden, bazarda azyq-túlik mol bolýy kerek. Aqtóbedegi 20 bazar ázirge jetkilikti»,- dedi óńir basshysy.
Aıta keteıik, «Aqtóbe» áleýmettik-kásipkerlik korporatsııasynyń 37 mıllıon teńge bólingen bolatyn. Biraq bazarlardyń bári tolyq jumys istep turǵan joq. Degenmen, bıyl turaqtandyrý qoryna 1600 tonna kókónis pen kartop saqtaldy. Erteńnen bastap azyq-túlik satatyn bazarlardyń ýaqytyly jumys isteýin oblys ákimi apparatynyń qyzmetkerleri baqylaıdy.
