Saparbaev qoǵamdyq kóliktiń jolaqysyn kóterýdi suraǵan kompanııanyń jumysyn synady
AQTÓBE. QazAqparat - Aqtóbedegi jolaýshylar tasymalymen aınalysatyn kompanııalar jolaqyny kótere almaıdy. Oblys ákimi Berdibek Saparbaev shyǵyndy azaıtýdyń basqa jolyn izdeýdi tapsyrdy, dep habarlaıdy QazAqparat tilshisi.
Aqtóbedegi jolaýshylar tasymalymen aınalysatyn «Avtopark» JShS buǵan deıin birneshe ret ákimdikke usynys jasap, jolaqyny qymbattatýdy suraǵan bolatyn. https://kaz.inform.kz/news/aktobe-tasymaldaushylaryna-zholaky-tarifin-koteruge-ruksat-etilmedi_a2986799 Biraq qalalyq ákimdik ruqsat bermeı, shyǵyndardy eseptep, qujattaryn tapsyrǵan kompanııanyń tarıfti kóterý suranysyn keri qaıtardy. Keıin jolaýshylar tasymalymen aınalysatyn kompanııa bankrot bolamyz dep qaıta-qaıta baspasóz máslıhatyn ótkizdi. Eki arada jolaýshylardyń shaǵymy kóbeıip, avtobýs ishiniń tazalyǵy, qyzmet kórsetýi týraly suraqtar órshidi. «Qoǵamdyq kólikterdiń ýaqyt ara qashyqtyǵy men qozǵalys kestesi, qalalyq avtobýstar salonynyń sanıtarlyq-tehnıkalyq jaǵdaıy kóńil kónshitpeı otyr. Aqtóbelikter keıde aıaldamada saǵat boıy turyp qalatyndaryn aıtyp, shaǵymdanýda. Tarıf kóterilmeıdi! Sizder jeńil joldy taýyp alǵansyzdar. Barlyq suraqty tarıf arqyly sheshýge daǵdylanǵansyzdar. Kiris ákeletindeı jumys isteý úshin tıimsiz shyǵyndardy azaıtyp, túsetin paıdany baqylaýdy kúsheıtińizder»,- dedi oblys ákimi Berdibek Saparbaev.
Qarjy tapshylyǵyn syltaý etken «Avtopark» jáne «Aqtóbe qalasynyń «Jolaýshylar tasymaly kásiporny» JShS-niń barlyq avtobýsqa GPS baqylaý ornatýy mindetteldi. Jumysty «Jolaýshylar tasymalyn basqarý ortalyǵy» JShS úılestiredi. Búginde «Aqtóbe qalasynyń Jolaýshylar tasymaly kásiporny» JShS-niń barlyq avtobýstary men shaǵyn avtobýstary GPS-trektermen jabdyqtalǵan eken. Al «Avtopark» JShS kólikterge qondyrǵyny ornatý jumysyn áli jalǵastyryp jatyr. GPS arqyly avtobýstardyń qozǵalysy, aınalymda bolǵan ýaqyty, aıaldamalar sany avtomatty túrde shyǵarylady. Bárin bir jeli arqyly baqylaýǵa múmkindik bar. «Aldaǵy ýaqytta kez kelgen jolaýshy avtobýstardyń qozǵalysy bile alady. Arnaıy mobıldi qosymsha daıarlanyp jatyr. Júıe jumysy bir aıdyń ishinde sheshiletin bolady»,-dedi qala ákiminiń orynbasary Jandos Baıyrhanov. Aqtóbede GPS-trekerlerden keıin jolaýshylardyń naqty sanyn anyqtaýǵa múmkindik beretin elektrondy bıletti engizý josparlanyp otyr.
