Saparbaev qıyndyqqa qaramastan aıǵaılap, kóshege shyqpaıtyn múgedekterge alǵys aıtty
AQTÓBE. QazAqparat - Aqtóbe oblysynyń ákimi Berdibek Saparbaev qıyndyqtarǵa qaramastan aıǵaılap, kóshege shyqpaıtyn múgedekterge alǵys aıtty, dep habarlaıdy QazAqparat tilshisi.
Aqtóbede «Biz birgemiz!» atty áleýmettik aktsııasy ótti. Atalmysh shara múgedek jandardyń ózge adamdarmen teń dárejede ómir súre alatynyn, olar da qýanyp, qoǵammen aralasa alatynyn kórsetýge baǵyttalǵan. 18 jyldan beri kóktemde el ekonomıkasy men mádenıetine, sportqa úles qosyp júrgen belsendiler osy ortaǵa qonaq bolyp shaqyrylady. Olardyń arasynda otbasyly juptar da bar. Arbaǵa tańylǵandardyń jigeri men tabandylyǵyna tánti bolǵan oblys ákimi búgin óz alǵysyn jetkizdi.
«Deni saý adamdardan qalmaı, qoǵamǵa, memleketke óz úlesterińizdi qosyp kelesizder. Sizder qandaı qıynshylyq bolsa da shydap, kóshege shyqpaı, aıǵaılamaı, shýlamaı memleket saıasatyn qoldap otyrsyzdar. Sol úshin sizderge myń da bir raqmet. Memlekettik qyzmette júrgennen keıin sizderge qyzmet kórsetýge biz mindettimiz. Bári jaqsy dep aıtýǵa bolmaıdy. Biraq múmkindiginshe qoldap, kómek kórsetemiz. Jumys ári qaraı jalǵasady»,- dedi oblys ákimi Berdibek Saparbaev.
Aktsııaǵa sal aýrýyna shaldyqqan azamattardy qoldaý qalalyq ortalyǵynyń 100-den astam múshesi shaqyrylyp, olarǵa dastarhan jaıyldy. «Atameken» dep ym-ısharamen án oryndaǵan múmkindigi shekteýli jandar osy kúndi asyǵa kútti. Olar bir aı boıy daıyndalǵan. Bári І, ІІ-top múgedegi. Soǵan qaramastan, mádenı sharadan tys qalmaı, óner kórsetýdi bári baqyt sanaıdy. Áleýmettik aktsııa kezinde 20 otbasylyq jupqa baǵaly syılyqtar tabys etildi. Qonaq bolǵan árbir múgedek janǵa arnaıy syı jasaldy.
Aıta keteıik, oblysta 24 myń múgedek bar. Olardyń 2 myńy kámelet jasqa tolmaǵandar.
