Saparbaev kelisimshartty oryndamaǵan qytaılyq kompanııa basshysynyń ýádesin aldy
AQTÓBE. QazAqparat - Aqtóbe oblysynda túrli tústi metall, munaı men gaz, hrom óndirip otyrǵan kompanııalardyń keıbiri kelisimshart talaptaryn oryndamaı otyr. Berdibek Saparbaev ıgerilip jatqan ken aldymen halyq ıgiligine paıdalanylýy qajet ekenin aıtty, dep habarlaıdy QazAqparat tilshisi.
Aqtóbede jer qoınaýyn paıdalanyp otyrǵan kompanııalardyń arasynda iri ınvestorlar bar. Olar kóbi munaı-gaz, metall, hrom kenderin óndiredi.
«Jerasty baılyǵy halyq ıgiligine, ekonomıkanyń damýyna jumsalýy kerek. Árbir jer qoınaýyn paıdalanýshy kelisimshartqa baılanysty mindetterin tolyǵymen oryndaýy tıis. Ókinishke qaraı, keıbiri talapty oryndap otyrǵan joq. Talaptardy oryndamaǵan 5 jer qoınaýyn paıdalanýshymen kelisimshart buzyldy. Jumys ári qaraı jalǵasady. Taǵy 8 kompanııanyń jumysy qaralyp jatyr, eskertý berildi»,- dedi Aqtóbe oblysynyń ákimi Berdibek Saparbaev.
Jer qoınaýyn paıdalanýshylar kelisimshart boıynsha ınflıatsııa deńgeıi kóterilgende jalaqyny ósirýi tıis. Aqtóbe oblysy boıynsha 20 kompanııa jalaqyny 10 paıyzǵa, keıbiri 15 paıyzǵa arttyratyn boldy. Al «jaǵdaıymyz jaqsy emes» degen 12 kompanııa jumysshylarynyń eńbekaqysyn kótere almaıtyn boldy. Olardyń qatarynda munaı, qıyrshyqtas kompanııalary bar. Qazirgi kezde kelisimsharttaǵy ınvestıtsııa tartý talaptaryn oryndamaı otyrǵan kompanııalar: «Dıdar», «AktóbeStılProdakshn, «Temir Servıs», «Aqtóbe ken», «Ken Qazyna» seriktestikteri. Óńir basshysy Berdibek Saparbaev kelisimshart talaptaryn oryndamaǵan «Ada Oıl» kompanııasynyń bas dırektory Lım Keon Mýgti ornynan turǵyzdy.
«Shyn máninde biz mindetterimizdi oryndaı almadyq. Onyń birneshe sebebi bar. Birinshiden, rezerýarymyz az, sáıkesinshe munaı az óndirildi. Eksport azaıdy. Alǵashynda munaıdyń 70 paıyzyn eksporttaýǵa kelisim berildi, biraq biz 40 paıyzyn eksporttap otyrmyz. 2018 jyly mindetterdi tolyq oryndaýǵa ýáde beremiz»,- dedi «Ada Oıl» kompanııasynyń bas dırektory Lım Keon Mýg. 
Óńir basshysy sońǵy 2 jylda kelisimshart talaptaryn oryndamaı otyrǵan kompanııa jumysy qadaǵalaýda bolatynyn, oryndalmasa eki aradaǵy baılanys úziletinin jetkizdi. 
