Saparbaev: Qazirgi zamanda básekelestik bolmasa, memlekettiń damýy qıyn
AQTÓBE. QazAqparat - Aqtóbede 6 myńnan astam oqýshy mektep bitirdi. Olardyń 444-i «Altyn belgi» úmitkeri, dep habarlaıdy QazAqparat tilshisi.
Búgin Qazaqstanda sońǵy qońyraý soǵyldy. Aqtóbe oblysy boıynsha bıyl 6582 oqýshy mektep bitirip jatyr. Olar alda emtıhan tapsyryp, UBT synaǵynan ótedi. Aqtóbe oblysynyń ákimi Berdibek Saparbaev qaladaǵy №55 orta mektepke baryp, túlekterdi quttyqtady.
«Qazirgi zamanda básekelestik bolmasa, ol memlekettiń damýy óte qıyn. Árbir memlekettiń damýy, onyń adamı kapıtalyna baılanysty. Sondyqtan memlekette neǵurlym bilimdi, tárbıeli, densaýlyǵy myqty azamattar bolsa, ol memlekettiń bolashaǵy bar, halqynyń turmysy, jaǵdaıy árdaıym jaqsara túsedi. Qazaqstan álemniń damyǵan 30 eliniń qataryna enýi úshin azamattary qazirgi dúnıejúzi talabyna, standartyna saı bilim alýy kerek, úsh tildi meńgerý kerek. Qazirgi tańda Memleket basshysy Nursultan Nazarbaevtyń tapsyrmasyna sáıkes búkil Qazaqstanda, Aqtóbe óńirinde de bilim salasyna bar jaǵdaı jasalyp jatyr»,- dedi Berdibek Saparbaev.
Aıta keteıik, ótken jyly oblys boıynsha 4,7 mlrd. teńgege 13 bilim ordasynyń qurylys jumystary júrgizilip, onyń 8-i paıdalanýǵa berildi. Bıyl 8540 oryndy 20 mektep salynyp jatyr.
