Saparbaev kabınette otyryp, qolyn qaltasynan shyǵarmaı júretin sheneýnikterdi synady
AQTÓBE. QazAqparat - Aqtóbe oblysynyń ákimi Berdibek Saparbaev Alǵa aýdanyndaǵy mektep ınternat qurylysymen tanysyp, birqatar kemshilikter anyqtady, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev Alǵa aýdanyndaǵy mektep-ınternattyń qurylysyn synǵa aldy. 600 oryndy bilim ordasy aýdandaǵy úshaýysymdy mektep problemasyn sheshýge múmkindik beredi. Biraq qurylys jumystary kezinde birqatar kemshilikter jiberilgen.
Máselen, bir mektepte eki basty kireberis bar. Bul joǵary jáne bastaýysh synyp oqýshylaryna arnalǵanymen, bos oryndy bólme etip qaıta jabdyqtaýǵa tapsyrma berildi. Sonymen qatar, mekteptiń májilis zalynda birneshe betti árleý bólmesi qarastyrylǵan. Óńir basshysy tapsyrys berýshi Aqtóbe oblystyq qurylys, sáýlet jáne qala qurylysy basqarmasynyń qateligin betine basty.
«Bir mektepke eki esik kerek emes. Únemi eskertý jasaımyn. Jobany qarap, qurylys jumystaryn tekserip otyrǵan durys. Artyǵyn alyp tastap, qajettisin jobaǵa engizý qajet. Tehnıkalyq baqylaý, avtorlyq baqylaý qaıda qarap otyr? Kabınetten shyǵyp, qaraý kerek. Tipti, mekteptegi májilis zalyna úsh betti árleý bólmesin jasap qoıǵan. Buryn eskertý jasap, basqa aýdanda aldyryp tastaǵan edim. Sol qatelikti ekinshi ret jiberip tursyńdar»,- dedi Aqtóbe oblysynyń ákimi Berdibek Saparbaev. Óńir basshysy Aqtóbe oblystyq qurylys, sáýlet jáne qala qurylysy basqarmasy basshysynyń mindetin atqarýshy Nurtas Seıitovke kabınette otyryp emes, qurylysty aralap júrýdi tapsyrdy.
Aıta keteıik, Alǵa aýdanyndaǵy 600 oryndy mektep, 100 oryndy ınternat qurylysy keler jyly paıdalanýǵa beriledi. Qurylys jumystaryna 1,7 mıllıard teńge jumsalyp jatyr. Al 2018-2019 jyldary Aqtóbeniń Hromtaý aýdanynda da mektep-ınternat salynady. Aqtóbe oblysynyń ákimi Berdibek Saparbaev óńirdiń barlyq aýdan ortalyǵyna dál osy jolmen mektep-ınternat salýdy josparlaý qajet ekenin aıtty. Qazir úsh aýdanda bar.
