Saparbaev: isin jańa bastaǵan kásipker qandaı qoldaý sharalary bar ekenin bilmeıdi

TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen oblys ákimdiginde ótken kezekti keńeste kásipkerlik salasyndaǵy qarjylyq qoldaý tetikterine qatysty birqatar máselelerdi saralandy, dep habarlaıdy QazAqparat tilshisi.

Kásipkerlik jáne ındýstrıaldy-ınnovatsııalyq damytý basqarmasynyń basshysy Aspandııar Seısebaevtyń aıtýynsha, búginde bıznesmenderge kásibin damytýǵa tamasha múmkindikter beretin túrli baǵdarlamalar bar.

«Bıznestiń jol kartasy» aıasynda jalpy somasy 4,5 mlrd teńgege 85 joba sýbsıdııalandy, 1,1 mlrd teńge somasyna 62 jobaǵa ishinara nesıelik kepildikter berildi. Sondaı-aq, bes kásiporynǵa 286,4 mln teńge somasyna ınfraqurylym júrgizildi.

«Qarapaıym zattar ekonomıkasy» baǵdarlamasy boıynsha ekinshi deńgeıli bankter men «Agrarlyq nesıe korporatsııasy» AQ arqyly jalpy quny 49 mıllıard teńgeni quraıtyn 136 joba qarjylandyryldy. Eki baǵdarlama aıasyndaǵy jobalardyń basym bóligi óńdeý ónerkásibi men aýyl sharýashylyǵy salalaryn damytýǵa baǵyttalǵan.

«Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy boıynsha 33,5 mıllıon teńgege jeti joba maquldandy. Qazir tańda taǵy 20 joba qarastyrylýda.

Óńirlik kásipkerler palatasynyń dırektory Samat Qosalıev «Atameken Taraz» mıkrokredıttik uıymy 401 kásipkerge 1,6 mıllıard teńge kóleminde qoldaý kórsetkenin aıtty.

«Taraz» ÁKK ÁKK UK» AQ Basqarma tóraǵasy Oljas Qarjaýov turǵyndardyń tabysyn arttyrý pılottyq jobasy jáne «Egistikten sórege deıin» jobasy aıasynda qarjylandyrýdyń qandaı tetikteri usynylatynyn jetkizdi.

Keńes barysynda Berdibek Saparbaev turǵyndardyń memlekettik baǵdarlamalardan habardar emestigin jáne ózderiniń jańadan bastaǵan kásipterine qandaı qoldaý sharalary usynylatyndyǵyn bilmeıtindigin atap ótti. Bul oraıda jıynǵa beınebaılanys rejıminde qatysqan birqatar aýdan ákimderine syn aıtyldy.«Bıznestiń jol kartasy» baǵdarlamasynyń maqsaty – turaqty jumys oryndaryn saqtaı otyryp, jańa oryndardy ashý. Bul óte mańyzdy. Deıturǵanmen, aýdandarda baǵdarlama tetikterin paıdalanýǵa degen suranys tómen.

Nege? Máselen, Jýaly aýdany tek eki jobany usynǵan, al Moıynqum aýdanynda birde bir joba joq, - dep qatań eskertti oblys ákimi.

Agrarlyq salada da jumys qajetti deńgeıde atqarylmaı otyr. Moıynqum men Talas aýdandarynda aýyl sharýashylyǵyn qoldaý qory arqyly bólingen qarjy tolyqtaı ıgerilmegen. «Agrarlyq nesıelik korporatsııa» AQ arqyly qarastyrylǵan qarjy da tolyqtaı qajetke jaratylmaǵan.

Oblys ákimi osy oraıda kórsetkishterdi joǵarylatyp, memlekettik baǵdarlamalar týraly turǵyndar arasyndaǵy túsindirý jumystaryn jónge keltirýdi tapsyrdy.