Saparbaev iri munaı kompanııasyna usynys aıtty

AQTÓBE. QazAqparat - Aqtóbe oblysynyń ákimi Berdibek Saparbaev óńirdegi munaı-gaz kompanııa ókilderimen kezdesip, ujymdyq kelisimsharttyń oryndalýyn talap etti, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Aqtóbedegi iri munaı kompanııalarynyń basshylarymen ótken jıynda ınvestıtsııa salý, ujymdyq kelisimshartty oryndaý, bıznestiń áleýmettik jaýapkershiligi sekildi máseleler qamtyldy.

Óńir basshysy Berdibek Saparbaev bir kúnde «SNPS-Aqtóbemunaıgaz» AQ, «Uly Qabyrǵa», «QazahOıl» JShS jumysymen tanysty. Eń iri munaı óndirýshi - «SNPS-Aqtóbemunaıgaz» AQ. Bul kompanııaǵa óndiriletin munaıdyń 67% jáne gazdyń 88% tıesili. Ári Qazaqstannyń munaı naryǵyndaǵy kómirsýtek shıkizatyn óndirý úlesi 7,7 paıyzdy quraıdy. Qazirgi kezde kompanııada 6,3 myńnan astam adam jumys isteıdi.

«CNPS-Aqtóbemunaıgaz» AQ bas dırektory Van Tszıýnjen jıynǵa qatysýshylarǵa ótken jyldyń qorytyndysyn jetkizdi.  Ótken jyly kásiporyn 5 mıllıon tonna munaı jáne munaı ónimderin óndirgen. Sonymen qatar, 5,105 mıllıard tekshe metr taýarly ilespe gazy taratyldy. Bul kompanııa tarıhyndaǵy rekordtyq kórsetkish. Óndiristi damytýǵa shamamen 100 mlrd teńge ınvestıtsııa salyndy.

«Aktsıonerlik qoǵam basshylyǵynyń esebi qanaǵattandyrarlyq, jumys berýshi men eńbek ujymy arasyndaǵy áleýmettik-seriktestik qarym-qatynas turaqty. Basshylyq Memleket basshysy men Úkimettiń qoıǵan tapsyrmalaryntyń mańyndylyǵyn túsinip otyr»,- dedi oblys ákimi B.Saparbaev.

Jıyn kezinde óńir basshysy Óner ortalyǵyn salǵan munaı kompanııasyna óz alǵysyn jetkizdi. Mádenıet oshaǵy ótken jyly salynyp, paıdalanýǵa berildi. Joba quny - 1,5 mıllıard teńge.

«Óner ortalyǵynyń ashylýy qalamyzdyń mádenı ómirindegi mańyzdy oqıǵa boldy. Aqtóbelikterdiń atynan osy erekshe nysannyń qurylysy úshin rızashylyǵymdy bildiremin. Áleýmettik jaýapkershilikti odan ári tıimdi júzege asyrý maqsatynda Aqtóbede el Prezıdentiniń «Tsıfrlyq Qazaqstanǵa» kóshý mindetterin oryndaýǵa múmkindik beretin jańa aqparattyq tehnologııalar ortalyǵyn salýdy usynamyz»,-dedi B.Saparbaev.

Aqtóbe oblysy ákiminiń baspasóz qyzmetiniń habarlaýynsha, óńir basshysy ujymdyq kelisimsharttardyń oryndalýyn, jumysshylardyń eńbekaqylaryn keminde 15% arttyrýdy, jumys oryndarynyń saqtalýyna jáne sheteldik jumys kúshi sanyn azaıtýǵa basa nazar aýdardy.

Kezdesý sońynda oblystyq ákimdik, «SNPS - Aqtóbemunaıgaz» AQ jáne kásipodaqtardyń aımaqtyq birlestigi arasynda eńbek qatynastaryn retteý jáne jumysshylarǵa áleýmettik kepildikter berý máseleleri boıynsha memorandýmǵa qol qoıdy.