Saparbaev Hromtaýda «Halyq qaýipsizdigin qamtamasyz etý» jobasy aıasyndaǵy jumystarmen tanysty
AQTÓBE. QazAqparat - Aqtóbe oblysynyń ákimi Berdibek Saparbaev Hromtaý aýdanyna baryp, «Halyq qaýipsizdigin qamtamasyz etý» jobasy aıasyndaǵy jumystarmen tanysty, dep habarlaıdy QazAqparat tilshisi.
Aqtóbede «Halyq qaýipsizdigin qamtamasyz etý» jobasy iske asyrylyp jatyr. Aýyl jumyssyzdaryna kásipkerlik negizderin túsindirý, qysqa merzimdi kýrstarda oqytý, áleýmettik máselelerdi sheshý, dinı ahýaldy turaqtandyrý jumysy aıasynda birqatar aýdandarda aýqymdy shara uıymdastyryldy. Hromtaý aýdanyna jumys saparymen barǵan oblys basshysy Berdibek Saparbaev memlekettik baǵdarlamalardyń júzege asyrylýymen tanysyp, turǵyndarmen kezdesti.Úsh aýyldy qamtıtyn Tabantal aýyldyq okrýginde 500-den astam adam turady. Eki iri kompanııa, 40-tan astam sharýa qojalyǵy bar. Shırek ǵasyr buryn salynǵan aýyl mektebiniń shatyry aýystyrylǵanymen áli de jóndeý jumystary qajet. Oblys ákimi kabınetterdi, ashana, sport zaldy qarap shyǵyp, ǵımarattyń ishki bezendirilýine qatysty birqatar eskertýler aıtty.
«Oblysta «Halyq qaýipsizdigin qamtamasyz etý» jobasynyń júzege asyrylyp jatqandyǵyn bilesizder. Quramyna sarapshylar, teologtar, úkimettik emes uıymdar men memlekettik organdardyń ókilderi kiretin toptar 9 qazannan bastap Áıteke bı, Muǵaljar, Mártók, Temir, Qarǵaly, Baıǵanın, Shalqar jáne Hromtaý aýdandarynda jumys jasap júr. Bári ózekti áleýmettik máselelerdi sheshýge, dinı ekstremızmniń aldyn alýǵa, memlekettik jáne salalyq baǵdarlamalardyń júzege asyrylý suraqtaryn túsindirýge, óńirdegi bıznes ortany damytýǵa baǵyttalǵan»,- dei Berdibek Saparbaev. Aqtóbe oblysy ákiminiń baspasóz qyzmetiniń habarlaýynsha, aýyl turǵyndary 28 shaqyrymdyq joldyń jaǵdaıyn aıtty. Aldaǵy ýaqytta joldy tegisteý, shuńqyrlardy qalpyna keltirý jumysy júredi. Kezdesý kezinde Berdibek Saparbaev otyn, maldyń jem-shóbin aldyn ala oılastyrý kerektigin turǵyndardyń esine saldy. Al Aqjar aýyldyq okrýgindegi kezdesý kezinde kósheni jaryqtandyrý jáne aýyldardyń birin gazdandyrý suraqtarynyń sheshimin talqylady. Jol boıyndaǵy qyzmet kórsetý sapasy da tekserildi.
«Jol boıyndaǵy qyzmet kórsetýdi damytý kerek. Jol boıyndaǵy kempıngter, avtoservıster men dámhanalar jumys kózi, paıda tabýǵa berilgen múmkindik»,- dedi óńir basshysy. Keıin Hromtaý aýdanynyń ishki ister bóliminiń jedel basqarý ortalyǵynyń jumysymen, №6 qalalyq gımnazııanyń qyzmetimen tanysty. Jospar boıynsha Hromtaýda áleýmettik topqa arnalǵan 48 páterli eki úı, dene shynyqtyrý-saýyqtyrý kesheni, aýdandyq ákimdiktiń ákimshilik ǵımaratynyń qurylysy júrgiziledi.
«Mobıldi toptar azamattardy tolǵandyrǵan máselelerdi sol jerde sheship, olarǵa qajetti keńes berý úshin jumys isteıdi. Sonymen qatar, bir-birimizge habarlap otyryp sheshetin máseleler de bar. Bul eń aldymen óskeleń urpaqty tárbıeleýge qatysty. Ár ata-ana óz balasyn qadaǵalap, onyń nemen aınalysyp jatqanyn, nege qyzyǵatynyn, túnde qaıda júretinin bilýi tıis. Ár oqýshynyń bolashaǵy muǵalimge baılanysty. Balalarymyzdy Otanyn, jerin, otbasyn, ulttyq salt-dástúrin súıýge tárbıeleýimiz qajet. Elbasy óziniń «Bolashaqqa kózqaras: qoǵamdyq sanany jańǵyrtý» atty maqalasynda osy jaıynda aıtqan bolatyn», -dedi Berdibek Saparbaev Hromtaý turǵyndarymen kezdesýi kezinde.
