Saparbaev halyq aldynda ne úshin uıalatynyn aıtty
AQTÓBE. QazAqparat - Aqtóbe oblysynyń ákimi Berdibek Saparbaev ýaqytyly shyǵarylmaı jatqan qoqystardy kórip, halyq aldynda uıalatynyn jetkizdi, dep habarlaıdy QazAqparat tilshisi.
Búgin qalanyń 5 aılyq áleýmettik-ekonomıkalyq damý kórsetkishin qorytyndylanyp, óńir basshysy qala ákimi Іlııas Ispanovtyń jumysyn nashar dep baǵalady.
«Qoqys máselesinde óz-ózimizge problema jasap aldyq. «Aqjol» kompanııasy, taǵy basqalary kináli dep aıtamyz, biraq sodan beri 2 aı ótti. Keshe ǵana jınalyp, qolda bar tehnıkany sanap shyqtyq. Tehnıka jetkilikti. Tek ákimdik jaqsy syzba jasap, sony kún saıyn tańerteń tekserý kerek edi. Qala ákiminde 4 orynbasary bar. Jastardy jumysqa aldyq. Biraq jumys mardymsyz. Shynyn aıtqanda, qoqys kompanııalarynda keıinge sheginetin jol joq. Tártip ornatý kerek. Óńir basshysy retinde qala turǵyndary aldynda uıalamyn. Áleýmettik jelide qoqysqa jıi shaǵymdanady. Kún saıyn qarap otyramyn. Men endi oblys ekonomıkasymen emes, qoqys máselesimen aınalysýym kerek pe?»,- dedi oblys ákimi Berdibek Saparbaev.
Aıta keteıik, Aqtóbede qoqys shyǵaratyn kompanııalar sany 10-nan 4-ke qysqartyldy. Aqtóbe qalasy boıynsha 32 qoqys tehnıkasy bar. Onyń tórteýi buzylyp qaldy. Jıyn kezinde oblys ákimi Berdibek Saparbaev jol salý, qurylys, qoqys máselelerin der kezinde sheshý úshin úsh komıssııa qurylatynyn málimdedi.
«Qazaqstandaǵy oblys ortalyqtary ishinen eń las qala - Aqtóbe qalasy. Bul uıat. Bir aıdyń ishinde bárin retke keltiremiz dep ýáde bergen edi. Biraq eki aı ótti, áli jumys nashar. Osylaı qoqystyń ortasynda otyra beremiz be?»,- dedi B.Saparbaev.
Buǵan deıin habarlaǵanymyzdaı, qaladaǵy qoqysty shyǵarý úshin 10 kompanııa jumysqa kirisken bolatyn. Biraq arada 2 aı ótkenimen, másele oń sheshimin tappaı, kompanııalar aıyppul tóleı bastady.
