Saparbaev fýtbolshylarǵa: Jigitterde namys bolýy kerek
AQTÓBE. QazAqparat - Aqtóbe oblysynyń ákimi Berdibek Saparbaev «Aqtóbe» fýtbol klýbyna bas bapker Vladımır Mýhanovty tanystyrdy, dep habarlaıdy QazAqparat tilshisi.
«Aqtóbe» fýtbol klýbyna bas bapker bolyp Vladımır Mýhanov taǵaıyndalyp, búgin ol komandaǵa tanystyryldy. Oblys ákimi Berdibek Saparbaev fýtboldaǵy jaǵdaıdyń qıyn ekenin aıtyp, oıynshylardy bir otbasynyń balasyndaı jumylýǵa shaqyrdy.
«Aqtóbe» fýtbol klýbyn damytý úshin kóp adam Vladımır Mýhanovty qaıtarýdy surady. Ol bas bapker bolǵan kezde komanda Qazaqstan chempıony, Sýper Kýbok ıegeri bolyp, Eýropa Lıgasy oıyndaryna qatysty. Sondyqtan Vladımır Mýhanovqa ótinish jasadyq. Ótken aptada jeke kezdesý ótip, kelissóz júrdi, ol kelisti. Qazir klýbtyń jaǵdaıy jaqsy emes, biraq sheshimi tabylady. Alda áli 10 oıyn bar. Onyń tórteýi syrt alańda ótedi. «Qaırat», «Astana», «Ordabasy» sekildi myqty komandalarmen aradaǵy oıyn bizdiń ortalyq stadıonda ótetinin eskersek, jaǵdaıdy durystaýǵa múmkindik bar. Aıta keterligi, komandadaǵy moraldyq-psıhologııalyq jaǵdaı durys bolýy kerek. Qazir ondaı joq. Burynǵy bas bapker Rahaevtyń ózi unatatyn oıynshylary bolǵan. Sportta súıikti oıynshylar bolmaýy kerek»,- dedi Aqtóbe oblysynyń ákimi Berdibek Saparbaev.
Sportshylarmen kezdesý ári bas bapkerdi tanystyrý kezinde óńir basshysy jigitterde namys bolýy kerektigin qaıtalap aıtty. Keı oıynshylardy ornynan turǵyzyp, alańdaǵy kórsetkishterin synady.
«Biz eshkimge eshqandaı ýáde bermeımiz. Jumys isteseńder, jalaqy alasyńdar, jumys istemeseńder, jalaqy almaısyńdar. Legıonerlerge jetkizý kerek. Olardy bizdiń jastar tájirıbe jınasyn, óz bilgenimen bólissin dep shaqyrdyq. Tek oınap ketpesin. Talap myqty bolady.
Bir otbasydaı jumys isteıik. Biz óz ýádemizdi oryndaımyz, sender de ýádede turyńdar. Jaǵdaıdy jaqsartý úshin bar kúshterińdi salyńdar»,- dedi B.Saparbaev.
Aıta keteıik, 13 maýsymda kezekti transfer ashylady. Jergilikti ákimdik bas bapker Vladımır Mýhanovqa shekteý qoımaıtyndaryn, burynǵy oıynshylardy komandaǵa qaıtarý kelisimi júrip jatqanyn jetkizdi. «Komandada 25 oıynshy bolsa, onyń 11-i jergilikti fýtbolshy eken. Biraq olardyń alańda júrgenin kórmeısin. Eń bolmasa 10-15 mınýtqa shyǵarý kerek. Olaı bolmasa jergilikti fýtbolshylardy tárbıeleı almaımyz», - dedi B.Saparbaev. 
