Saparbaev eń tómengi jalaqyny kóterýge qatysty túsinik berdi
NUR-SULTAN. QazAqparat – QR Premer-Mınıstriniń orynbasary Berdibek Saparbaev eń tómengi jalaqyny kóterýge yqpal etetin mańyzdy faktordy atady, dep habarlaıdy QazAqparat tilshisi.
«Qazirgi kezde osy máseleni pysyqtap jatyrmyz. Bul birinshi kezekte osy qadamdarǵa qansha qarjy qajet bolatynyna, sondaı-aq qarjylyq múmkindikke baılanysty», - dedi B. Saparbaev Parlament Májilisinde tilshiler saýalyna jaýap bere otyryp.
Osy oraıda ol eń tómengi kúnkóris deńgeıin, eń tómengi jalaqyny qaıta esepteý kerektigin atap ótti.
«Prezıdenttiń halyqtyń tabysyn arttyrý jóninde tapsyrmasy bar. Halyqtyń tabysy eń tómengi kúnkóris deńgeıine jáne eń tómengi jalaqyǵa qatysty bolyp tur», - dedi Úkimet basshysynyń orynbasary.
Sonymen qatar ol eń tómengi jalaqyny kóterýdiń qarjylandyrý kózi týraly aıtyp berdi.
«Bul óz kezeginde el bıýdjetine qatysty. Biz aldymen esepteýlerdi júrgizýimiz kerek, keıinnen bıýdjettiń qarjylyq múmkindigin qaraý qajet. Eń bastysy, bul sharalardy iske asyrý úshin ekonomıka, adamdar jumys isteýi tıis. Sáıkesinshe, ekonomıka ósimin qamtamasyz etý kerek. Sol kezde tabys bolyp, atalǵan kórsetkishti kóterýdiń kózderi aıqyndalady», - dedi B. Saparbaev.
