Saparbaev Elbasyna Aqtóbeniń áleýmettik-ekonomıkalyq ósimin baıandady
Óńirge jumys saparymen kelgen Elbasy Nursultan Nazarbaev Aqtóbe ferroqorytpa zaýytynda, Aqtóbe rels-arqalyq zaýyty men jylyjaı kesheninde, bıznestiń áleýmettik jaýapkershiligi aıasynda salynǵan birneshe nysanda boldy. Aqtóbelik belsendilermen, kásipkerlermen, óner adamdarymen kezdesti. Jubanovtar álemi ortalyǵyn, Shyǵarmashylyq akademııasy men Óner ordasynyń qurylysyn qarap shyqty.
Sapar kezinde Prezıdentke Aqtóbe oblysynyń ákimi Berdibek Saparbaev 8 aıdyń qorytyndysyn baıandady. Oblystyq ákimdiktiń baspasóz qyzmetiniń habarlaýynsha, óńirde ekonomıkanyń barlyq sektorynda ósim bar. Ónerkásiptik óndiristiń ındeksi 104,9%, aýyl sharýashylyq óndirisi 102,7%, ınvestıtsııa 130% deńgeıde. Qurylys keshenindegi jumys kólemi 111,9% qurap, 337 myń sharshy metr turǵyn úı paıdalanýǵa berildi.
«Kásiporyndardy jańǵyrtý aıasynda mamandardyń biliktiligin jetildirý jáne qaıta daıarlaý úshin 30 iri kompanııamen kelisimge qol qoıyldy. Búginde 10 kásiporyn jańǵyrtyldy. 2017 jyly jalpy somasy 18 mıllıard teńge turatyn 20 kompanııany jańǵyrtý kózdelýde. Nátıjesinde eńbek ónimdiligi 12% artyp, ónimderdi óndirý men qaıta óńdeýdiń ózindik quny 3% tómendeıdi. Sonymen qatar, osy jyldyń birinshi toqsanynyń qorytyndysy boıynsha qabyldanǵan sharalardyń arqasynda óńdeý óndirisiniń oblys ekonomıkasyna qosqan úlesi artty. Jumyssyzdyq 4,8% deńgeıinde saqtalyp tur, ıaǵnı bıyl 11,3 myń jańa jumys orny ashyldy», - dep habarlady oblys ákiminiń baspasóz qyzmeti.
Aqtóbe oblysynyń ákimi Berdibek Saparbaev «Rýhanı jańǵyrý: bolashaqqa baǵdar» baǵdarlamalyq maqalasyndaǵy tapsyrmalardyń oryndalýyna toqtaldy. Onyń sózinshe, bul baǵytta aýqymdy jumys atqarylǵan. «Týǵan jer» respýblıkalyq forýmy kezinde óńirge 21 elden 300-den asa aqtóbelik keldi. Nátıjesinde 25 kúrdeli operatsııa jasalyp, júzden astam kezdesý, semınarlar men sheberlik sabaqtary ótkizildi. Jalpy quny 76 mıllıard teńge bolatyn 20 memorandýmǵa qol qoıyldy. Forým qatysýshylary aımaqtyń damýyna taǵy 5 mıllıard teńge kóleminde demeýshilik kórsetedi. Berdibek Saparbaev memlekettik-jeke menshik seriktestik pen bıznestiń áleýmettik jaýapkershiligin damytý aıasynda atqarylǵan jumystardy da baıandady. Óńirde quny 50 mıllıard teńgeden asatyn 125 joba júzege asyrylyp jatyr.
