Saparbaev ekologııa máselesin sheshe almaǵan basshyǵa óndiristi aımaqta turýdy usyndy
AQTÓBE. QazAqparat - Aqtóbe halqy jaǵymsyz ıisten sharshap, bılikten kómek suraǵan edi. Búgin oblys ákimi Berdibek Saparbaev atmosferany lastap otyrǵan kásiporyn basshylary men olardy baqylaıtyn ekologtardy jınady, dep habarlaıdy QazAqparat tilshisi.
Aqtóbeniń ekologııalyq jaǵdaıy máz emes. Turǵyndardyń allergııaǵa shaldyǵyp jatqanyn buǵan deıin habarlaǵan bolatynbyz. Densaýlyǵyna eshqandaı shyǵym aıtpaǵan adamdardyń jótelip-túshkirip, ózderin jaısyz sezinýi sońǵy kúnderi jıilep ketti. Sonymen qatar, jaǵymsyz ıisten sharshaǵan qala turǵyndary birigip, máseleniń sheshimin surady.
Búgin Aqtóbe oblysynyń ákimi Berdibek Saparbaev ekologtardy, sanıtar mamandar men iri jáne orta bıznes ıelerin jınady. Óńir ekologııasyn lastaıtyn 167 iri jáne orta kásiporyn anyqtalsa, onyń 9-y aýa qaýipti qaldyqtardy atmosferaǵa shyǵarady. Olardyń arasynda óńir ekonomıkasynyń tiregi bolyp otyrǵan Aqtóbe rels-arqalyq zaýyty, Aqtóbe ferroqorytpa zaýyty, qurylys materıaldaryn shyǵaratyn «Stroıdetal» seriktestigi men Aqtóbe hrom qosyndylary zaýyty bar. Kóbine aýaǵa kúkirtti sýtek tastalyp, adamdardyń tynys alý joldaryna keri áserin tıgizip jatyr. Aqtóbe oblystyq ekologııa departamentiniń basshysy Jaqsyǵalı Imanqulov esep berdi. Biraq jumys mardymsyz.
«Jyl ótken saıyn ekologııalyq jaǵdaı nasharlap bara jatyr. Bárinde ósim bar. Ósim bolmasa, adamdar shaǵym aıtyp, aýrýǵa shaldyqpas edi. Sizdi (Aqtóbe oblystyq ekologııa departamentiniń basshysy Jaqsyǵalı Imanqulov-red) zaýyttar ornalasqan Mahambetovka aýdanyna kóshirý kerek. Bir aı sol jerde turyńyz, keıin ne aıtatyńyzdy kóreıik. Sizder ol jaqqa barmaısyzdar. Men baryp, halyqpen kezdesken kezde jaǵymsyz ıisti sezbegendeı keıip tanytamyn. Biraq men jaǵymsyz ıisti sezemin. Olar kún saıyn sol ıispen ómir súrip júr. Óz-ózimizdi sendirip, bári jaqsy dep aldamaıyq. Bári jaqsy bolsa, adamdar aýyrmas edi»,- dedi Aqtóbe oblysynyń ákimi Berdibek Saparbaev.
Jıyn kezinde óńir basshysy naqty jumystardyń nátıjesin surap, ekologııalyq talaptardy oryndamaǵan kásiporyndardy zań boıynsha jazalaýdy tapsyrdy.
