Saparbaev dárihanalardaǵy sharyqtaǵan baǵalardy retteýdi tapsyrdy
AQTÓBE. QazAqparat - Aqtóbe oblysynyń ákimi Berdibek Saparbaev ákimdik apparatynyń qyzmetkerlerin dárihanaǵa jumsap, dárilik preparattar baǵalarynyń sharyqtap turǵanyn anyqtady.
Jıyn barysynda baǵany kótermeý týraly memorandýmdy oryndamaǵan memorgandar basshylaryn syn tezine aldy, dep habarlaıdy QazAqparat tilshisi.
Osy kúnderi Aqtóbe oblysynyń ákimi Berdibek Saparbaev barlyq basqarma basshylarynan esep alýda. Jyldy qorytyndylap, jumysynyń nátıjesin kórsetken basqarma basshylary kóp jaǵdaıda kabınetten shyqpaı, qur sandyq kórsetkishke súıenetinin kórsetip otyr. Bul joly QR Densaýlyq saqtaý mınıstrligi medıtsınalyq jáne farmatsevtıkalyq qyzmetti baqylaý komıteti Aqtóbe oblysy boıynsha departamentiniń basshysy Qaırat Sabyr esep berdi.
Jıynǵa baǵaǵa myǵym, dári-dármektiń qunyn únemi salystyryp júretin ardagerler de qatystyryldy.
«Mamandarǵa tapsyrma berip, Aqtóbe qalasyndaǵy 10-ǵa jýyq dárihanany tekserttim. Eshqaısysynda paıyzdyq jeńildik joq. Alǵa, Shalqar, Qobda, Oıyl aýdandaryndaǵy dárihanalarda da osy jaǵdaı. Jeńildik múlde qarastyrylmaǵan. 30 paıyz jeńildik qaıda? Naqty jaǵdaıdy bilý úshin dárihanalardy aralap, kózben kórý kerek. Dárilik zattardyń baǵasyn ósirmeý týraly memorandýmǵa qol qoıyldy. Nátıjesi qaıda?», - dedi Berdibek Saparbaev.
Óńir basshysynyń aıtýynsha, 6 aqpan kúni ákimdik apparatynyń mamandary Alǵa, Shalqar, Qobda, Oıyl aýdandaryna monıtorıng júrgizgen. Nátıjesinde, birqatar dárilik zattardyń baǵasy óz qunynan joǵary satylǵany anyqtaldy.
«Máselen, 100 mıllıgramm dolananyń kelisilgen baǵasy - 95 teńge. Al dárihanada 255 teńgeden satylyp jatyr. Bul ımport emes qoı, nege qymbat? 100 mıllıgramdyq mııa tamyrynyń shyryny 250 teńgeden satylýy tıis. Biraq ol 350 teńgeden satylýda. Qarapaıym dárilerdiń baǵasy osyndaı, basqasyn aıtý qıyn»,- dedi ol.
Aqtóbe oblysy ákiminiń bul synyn ardagerler de rastady. Qarııa Keńes Birmanovtiń aıtýynsha, aýyl turǵyndary tegin beriletin dári-dármekterdiń tizimin bilmeıdi. Al emhana basshylyǵy men emdeýshi dárigerler tegin kómek týraly aqparatty jasyryp qalady.
Aıta keteıik, oblysta medıtsınalyq jáne farmatsevtıkalyq buıymdardy satýmen jáne taratýmen aınalysatyn 601 mekeme bar, onyń 386-sy dárihana (271-i Aqtóbe qalasynda, 97-si aýdandarda ornalasqan).
