Saparbaev CNPC kompanııasyna ındýstrııaldy jobalarǵa bólinetin ınvestıtsııany arttyrýdy usyndy
BEIJІŃ. QazAqparat - Aqtóbe oblysynyń ákimi Berdibek Saparbaev Qytaıǵa jumys sapary kezinde China National Petroleum Corporation (CNPC) basqarma tóraǵasy Van Ilınmen kezdesti, dep habarlaıdy Qytaıdaǵy «QazAqparat» HAA tilshisi.
Kezdesý kezinde eki jaq Qazaqstandaǵy CNPC kompanııasynyń ınvestıtsııalyq jáne sharýashylyq qyzmetin talqylady.
«Qazaqstanǵa saparyńyz kezinde Prezıdent Nursultan Nazarbaevpen kezdesip, Memleket basshysy Qazaqstan ekonomıkasyna ınvestıtsııa salǵan kompanııaǵa alǵysyn bildirdi. Sonymen qatar, «Pekın-Palas» jáne Astana horeografııa akademııasy qurylysy kezinde áleýmettik suraqtardyń sheshimi tabyldy. 20 jyl ishinde kompanııa tek Aqtóbe oblysyna 20 mıllıon dollar kóleminde ınvestıtsııa saldy. Taıaýda Memleket basshysy Nursultan Nazarbaev Aqtóbe oblysyna jumys saparymen kelip, «SNPS-Aqtóbemunaıgaz» AQ salǵan «Óner ortalyǵyn» qarap shyǵyp, rızashylyǵyn bildirdi. Aqtóbe oblysyndaǵy SNPS kompanııasy qyzmetiniń keńeıýine, ken oryndarynda geologııalyq barlaý jumystarynyń júrgizilýine baılanysty bizdiń óńirimizge salynatyn ınvestıtsııa kóletin arttyrýdy jón dep sanaımyz», - dedi Aqtóbe oblysynyń ákimi Berdibek Saparbaev.
Óńir basshysy CNPC kompanııasyna munaı-gaz salasynyna qajetti qosalqy bólshekter men qural-jabdyqtar shyǵaratyn birlesken kásiporyn jumysyn jandandyrýdy usyndy. Bul kásiporyn munaı men gazdy óńdeý jáne ózge de ındýstrııaldy jobalardy arttyryp, ımporttyq taýarlarǵa suranysty tómendetýge múmkindik beredi. Sonymen qatar, óńirdiń óndiristik qabileti artady.
«CNPC kompanııasynyń áleýmettik jaýapkershiligi týraly da aıta ketken jón. Keler jyly sizdiń kompanııamen birge taǵy birneshe áleýmettik jobany iske asyrýdy josparlap otyrmyz. Máselen, Aqtóbe qalasynan Qazaqstan men Qytaı arasyndaǵy dostyqty pash etetin saıabaq salýǵa bolady. Sonymen qatar, Jastar ortalyǵy da qajet. Bul óskeleń urpaq úshin ıgi is bolar edi», - dep atap ótti Berdibek Saparbaev.
Van Ilın Aqtóbe oblysynyń ákimi Berdibek Saparbaevty muqııat tyńdap, 20 jyl ishinde CNPC kompanııasy Qazaqstanǵa 15 mıllıard dollar salyq tólemderin aýdarǵanyn jetkizdi. Sonymen qatar, áleýmettik jobalardy iske asyrýǵa 150 mıllıon dollar kóleminde qarjy bóldi.
«Biz Qazaqstan men Qytaıdyń, sonyń ishinde Aqtóbe oblysy turǵyndarynyń senimdi serigi bolýǵa daıynbyz. Al qural-jabdyq pen qosalqy bólshek shyǵarýshy kompanııalar arasyndaǵy qarym-qatynasqa keler bolsaq, qazaqstandyq kásiporyndardy qoldaýǵa, olardyń usynystaryn qaraýǵa daıynbyz», - dedi ol.
Aıta keteıik, keshe ekijaqty kezdesý kezinde Aqtóbe oblysynyń ákimi Berdibek Saparbaev yntymaqtastyq memorandýmyna qol qoıdy. Tianjin Bohua Petrochemical qytaılyq korporatsııasy tabıǵı gazdan polıetılen jáne polıpropılen shyǵaratyn zaýytty salýǵa 4 mıllıard dollar ınvestıtsııa salýǵa daıyn. Al Kazakhstan Potash Corporation kompanııasy kalıı tuzy zaýytyn salady.
Zaýyt qurylysy kezinde «Nuctech» kompanııasynyń joǵary tehnologııasy paıdalanylady. «Xuefeng» jáne «Norinco International» kompanııalary jarylǵysh zattar jáne ammıakty selıtra shyǵaratyn zaýyt qurylysyn júrgizedi. Búgin Aqtóbe oblysynyń ınvestıtsııalyq múmkindikteri tanystyrylyp, 4 memorandýmǵa qol qoıyldy.
Sonymen qatar, Pekınde «Kazakh Invest» UK» AQ qoldaýymen Aqtóbe oblysy ákimdiginiń ókildigi ashyldy. Bul oblysqa ınvestıtsııa tartýǵa, eksport kólemin arttyrýǵa baǵyttalǵan jumys.
Berdibek Saparbaev Sinopec Group munaı-gaz kompanııasynyń, Qytaı munaı ýnıversıtetiniń basshylarymen, Qytaıda bilim alyp júrgen stýdenttermen kezdesti. Qudaıbergen Jubanov atyndaǵy Aqtóbe memlekettik óńirlik ýnıversıteti men Qytaı munaı ýnıversıteti arasynda ózara kelisim memorandýmyna qol qoıyldy.
