Saparbaev bıýdjetti ıgermegen basshyǵa jaýapkershilikten qutylmaıtynyn eske saldy
Málimetterge qaraǵanda, aımaqta ónerkásip óndirisiniń kólemi, negizgi kapıtalǵa ınvestıtsııalar tartý, belsendi shaǵyn jáne orta bıznes sýbektileriniń sany, aýyl sharýashylyǵynyń jalpy ónimi, oblystaǵy memlekettik kiris bıýdjetiniń taǵy basqa da jyldyq jospary 100%-dan asyra oryndalǵan. Sondaı-aq, qurylys jumystary men bólshek taýar aınalymynyń kólemi de jyl qorytyndysy boıynsha tolyq oryndalady dep kútilýde. Jalpy alǵanda oblystyq bıýdjettiń shyǵys bóligi 99,5%-ǵa oryndalǵan.
Degenmen, birqatar memlekettik baǵdarlamalardy júzege asyrýǵa qatysty másele de joq emes. Osyǵan oraı, aldaǵy ýaqytta basqarma basshylary qarjyny ıgermese, jaýap beredi. Synǵa ilikken basqarmalardyń biri - oblystyq dene shynyqtyrý jáne sport basqarmasy. Atalǵan basqarma 320 mıllıon teńgege jýyq qarjyny ıgermegen.
«Sport mektepterin jaraqtandyrý, sport ınfraqurylymyn jaqsartý úshin tıisti mınıstrlikter, vedomstvolarmen qarjy bólý jóninde jyl boıy jumys júrgizildi. Al nátıjesi osy! Bul jaýapkershiliktiń joqtyǵyn kórsetedi. Ásirese áleýmettik-mádenı sala nysandaryna «Jumyspen qamtý jol kartasy» baǵdarlamasy boıynsha bólingen qarajattyń ıgerilmegeni qynjyltady. Bizdiń mektepterdiń, balabaqshalardyń, joldardyń jaı-kúıin jaqsy bilemin. Memleket bizge jaǵdaıdy durystaý úshin, jaqsartý úshin qarjy bóledi, al biz ony ıgere almaımyz. Jaýapkershilikten qashamyn dep oılamańyzdar, olaı bolmaıdy»,- dedi óńir basshysy memlekettik baǵdarlama ákimshileriniń basshylaryna.
Aıta ketken jón, bıyl bıýdjet byltyrǵymen salystyrǵanda 15%-ǵa artqan.
Zada Zeıin