Saparbaev Bolgarııanyń Qazaqstandaǵy elshisimen kezdesti
AQTÓBE. QazAqparat - Aqtóbe oblysynyń ákimi Berdibek Saparbaev Bolgarııanyń Qazaqstandaǵy Tótenshe jáne Ókiletti Elshisi Vasılıı Petkovpen kezdesti, dep habarlaıdy QazAqparat tilshisi.
Aqtóbege kelgen Bolgarııa elshisi men óńir basshysy Berdibek Saparbaev saýda-ekonomıkalyq, mádenı yqtymaqtastyqty damytý jaıyn sóz etti. Óńir úshin Bolgarııada jaqsy damyǵan týrızm salasynyń tájirıbesi óte paıdaly ári qyzyqty.
«Qazaqstanda 100-den astam halyq pen etnıkalyq top ókilderi turady. Memleket basshysynyń saıasatyna sáıkes bizder barlyq azamattarǵa ulty men dinine qaramastan teń jaǵdaı jasap otyrmyz. Óz kezegimizde biz oblysymyzda turatyn bolgar azamattaryna Prezıdenttiń saıası baǵytyn qoldaıtyndyqtary úshin rızashylyǵymyzdy bildiremiz», - dedi oblys ákimi B.Saparbaev.
Óz kezeginde Bolgarııanyń Qazaqstandaǵy Tótenshe jáne Ókiletti Elshisi Vasılıı Petkov ulttar arasyndaǵy tatýlyqty joǵary baǵalady.
«Bul mańyndy sapar. Sebebi munda 1500 etnıkalyq bolgar ómir súredi. Oblys basshylyǵyna olardy qoldaǵany úshin alǵysymdy bildirgim keledi. Qazaqstan Prezıdenti Nursultan Nazarbaevtyń ultaralyq kelisim saıasaty aıasynda naqty ister qolǵa alynǵan», - dedi V.Petkov.
Aqtóbe oblysy ákiminiń baspasóz qyzmetiniń habarlaýynsha, Qazaqstanda 5 myńǵa jýyq etnıkalyq bolgar bolsa, onyń 1500-i Aqtóbe oblysynda turady. Bıyl bolgar ultynyń Qazaqstanǵa alǵash qonystanǵanyna 110 jyl toldy.
