Saparbaev: bıyl basty máselelerdiń biri - sýarmaly sýmen qamtamasyz etý
TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen ótken keńeste kóktemgi dala jumystaryna daıyndyq barysy pysyqtaldy, dep habarlaıdy QazAqparat tilshisi.
Oblys ákimi basty máselelerdiń biri retinde sýarmaly sýmen qamtamasyz etý ekenin atap ótti.
«Qys salystyrmaly túrde jyly boldy. Bıylǵy jyly qar byltyrǵyǵa qaraǵanda 40-50 paıyzǵa az tústi. Demek, sýarmaly sý máselesi taǵy da týyndaıdy.
Ádettegideı, oblysty sýmen qamtamasyz etý Qyrǵyzstanmen jasalǵan kelisimge baılanysty. Sondyqtan ótken jyldyń qyrkúıek aıynda men aýyl sharýashylyǵy alqaptaryn odan ári ulǵaıtý maqsatynda óńirdegi sý qoımalarynyń sý balansyn zerdeleýdi tapsyrǵan bolatynmyn. Sondaı-aq, aýyl sharýashylyǵy basqarmasyna ylǵaldyń kóp mólsherin qajet etpeıtin aýyl sharýashylyǵy daqyldaryn ıgerýdi qolǵa alý tapsyryldy. Munyń bári oblystyń azyq - túlik qaýipsizdigin qamtamasyz etýge jumys isteýi tıis», - dep atap ótti Berdibek Saparbaev.
Aýyl sharýashylyǵy basqarmasynyń basshysy Qaırat Amanovtyń aıtýynsha, bıyl oblystyń egistik alqaby 735 myń gektardan 760,8 myń gektarǵa, ıaǵnı 25,8 myń gektarǵa ulǵaıǵan. Onyń ishinde dándi jáne burshaq daqyldarynyń alqaby 19,5 myń gektarǵa, jem-shóp daqyldary alqaby 14,2 myń gektarǵa ulǵaıdy. Egistik alqaptarynyń eń kóp ósimine Qordaı jáne Shý aýdandary aýmaǵynda qol jetkizilgen.
«Qazirgi ýaqytta 71,3 myń tonna tuqym daıyndaldy, onyń 67,6 myńy – birinshi nemese úshinshi reprodýktsııaly. Qalǵan tuqymdar, ıaǵnı shamamen bes paıyzy elıtaǵa jatady. Aýyl sharýashylyǵy tehnıkalary kóktemgi egis jumystaryna 95 paıyzǵa daıyn», - dedi Q.Amanov.
Oblys ákimi ótken jyldyń sońynda kóterilgen aýylsharýashylyq brendterin qalyptastyrý ıdeıasyna taǵy da toqtaldy.
«Bizde tańqýraı, qulpynaı, pııaz, sarymsaq, alma ósirýge qolaıly jaǵdaı bar.
Balyq sharýashylyǵy men bal óndirisin ulǵaıtýǵa da múmkindik jetkilikti. Bul aımaq ekonomıkasyn nyǵaıtýǵa yqpal etedi. Bolashaqta bizdiń ónim shetelderge de shyǵýy kerek. Maqsatymyz – ımportty azaıtý, eksportty arttyrý, - dep atap ótti Berdibek Saparbaev.
Qaırat Amanov bıyl qulpynaı ósiriletin alqap 35 gektarǵa ulǵaıatynyn tilge tıek etti. Bal óndirisiniń kólemi de artpaq. Eger 2020 jyly 400 tonna bal óndirilse, 2021 jyly ony 700 tonnaǵa jetkizý josparlanýda.
Aımaq basshysy omartashylarǵa qoldaýdyń barlyq túrlerin kórsetýdi, sonyń ishinde memlekettik sýbsıdııalarmen qamtýdy tapsyrdy.
Sondaı-aq, aýylsharýashylyq daqyldaryn ártaraptandyrý máselesine de erekshe nazar aýdaryldy.
«Biz jyl saıyn tek bir daqyldardy ekpeýimiz kerek. Sizder naryqqa nazar aýdaryp, joǵary suranysqa ıe dúnıelerdi baqylańyzdar. Ózimizdi barlyq qajetti ónimdermen qamtamasyz etý jáne sol arqyly baǵany turaqtandyrý úshin aımaqtyń azyq-túlik qaýipsizdigi salasyna barynsha qamqorlyq tanytý qajet», - dep atap ótti Berdibek Saparbaev.
Egistikti sýarmaly sýmen qamtý máselesine kóńil bólgen aımaq basshysy barlyq qolda bar múmkindikterdi paıdalanýdy, atap aıtqanda, jer asty sýlarynyń qorlaryn zertteý jumystaryn jalǵastyrýdy, sondaı-aq barlyq sý resýrstarynyń teńgerimin zerdeleýdi tapsyrdy. Sonymen qatar, «Qazsýshar» RMK men «Sý resýrstaryn paıdalanýdy retteý jáne qorǵaý jónindegi Shý-Talas basseındik ınspektsııasy» RGP óńir sý qoımalarynyń jobalyq syıymdylyǵyn qamtamasyz etýi kerektigin basa aıtty.
Berdibek Saparbaev mal ósirýshilerdi jaıylymdyq jerlermen qamtamasyz etý máselesine de nazar aýdardy. Óziniń orynbasary Berik Nyǵmashevke oblystyń orman qoryn osy maqsattarǵa paıdalaný boıynsha jumystar júrgizýdi mindettedi.
«Men aýyl turǵyndarynan jaıylymdardyń jetispeýine qatysty shaǵymdardy jıi estımin. Bizde bos jerler bar, olardy sharýa qojalyqtaryna ondaǵy maldyń sanyna qaraı berýge bolady», - dedi oblys ákimi.
