Saparbaev bes kún ishinde Aqtóbe turǵyndaryn túgel jylýmen qamtýǵa tapsyrma berdi
AQTÓBE. QazAqparat - Aqtóbe oblysynyń ákimi Berdibek Saparbaev 15 qazan kúni Aqtóbe turǵyndaryn túgel jylýmen qamtýǵa tapsyrma berdi, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev jylý maýsymyndaǵy jumystardy pysyqtady. Oblystyq energetıka jáne turǵyn úı-kommýnaldyq sharýashylyq basqarmasynyń bastyǵy Dastan Amanovtyń aıtýynsha, qazirgi ýaqytta oblys turǵyndarynyń 67%, mektepterdiń 90%, balabaqshalardyń 97 % jáne densaýlyq saqtaý nysandarynyń 94% jylýmen qamtamasyz etildi. Al Aqtóbe qalasyndaǵy emdeý mekemeleriniń bárine jylý berildi. Tek keıbir mektep pen turǵyn úıler jylýsyz otyr. Aqtóbe oblysy ákiminiń baspasóz qyzmetiniń habarlaýynsha, qazir qajetti qatty otynmen, ıaǵnı, kómirmen túgel qamtamasyz etildi. Óńirge 38,5 myń tonna kómir jetkizildi. Sonymen qatar, 3,2 myń tonna dızel otyny daıyn. Bul bar qajettiliktiń tek 80% qurap otyr. Málimetterge súıensek, dızel otynyn jetkizý Baıǵanın jáne Yrǵyz aýdandarynda baıaý júrgizilip jatyr. Óńir basshysy Berdibek Saparbaev suıyq otyn qoryn tolyqtyrýdy jedeldetýdi tapsyrdy. Jıyn kezinde barlyq iri kommýnaldyq kásiporyndardyń basshylary esep berdi.
«15 qazanǵa deıin kópqabatty úılerdiń barlyǵynda jylý qosylýy kerek. Jylytý maýsymyn ótkizýge jaýapty basshylardyń jeke jaýapkershilikteri jóninde eskertemin. Aýdan ákimderi áleýmettik nysandarǵa jylý berilý jaǵdaıymen, sondaı-aq suıyq jáne qatty otyn qorynyń jetkilikti ekenine sol jerlerde júrip, jeke tanysýlary kerek»,- dep atap ótti Berdibek Saparbaev.
Aıta keteıik, bıyl kommýnaldyq nysandardy jylý maýsymyna daıyndaý úshin kásiporyndar men jergilikti bıýdjetten 8,3 mlrd. bólindi. «Búgingi kúni 239,5 shaqyrymdyq jylý jolyna, 273,6 shaqyrymdyq elektr jelisine jóndeý jumystary júrgizildi. Barlyǵy 638 qazandyq jylý maýsymyna daıyndaldy. Taıaýda 331,5 shaqyrymdyq sýmen jabdyqtaý jáne sý tartý júıelerininiń jóndeý jumystary aıaqtalady»,- dep habarlady oblys ákiminiń baspasóz qyzmeti.
Jıyn kezinde egin jınaý naýqanynyń aıaqtalýy sóz boldy. Aqtóbe oblystyq aýyl sharýashylyǵy basqarmasynyń bastyǵy Qusaıyn Sársenbaıdyń aıtýynsha, bıyl 512 myń tonnadan astam astyq jınaldy. Gektarynan 13,2 tsentner ónim alyndy. Qazirgi kezde kelesi jylǵy egin egý naýqanyna daıyndyq úshin topyraqty óńdep, qysqy daqyldardy egý jumystary aıaqtalyp qaldy. Aqtóbe oblysynyń ákimi Berdibek Saparbaev jemshóp daıyndaýdy jalǵastyrý, kelesi maýsymǵa daıarlanǵan tuqymdyq materıaldyń sapasyn tekserý, topyraqtyń durys óńdelip, tyńaıtqysh sebilýin qamtamasyz etýdi, egistik jáne sýarmaly jerlerdi kóbeıtý, aýyl sharýashylyǵynyń dástúrli emes túrlerin jáne kooperatıvterdi damytýdy tapsyrdy. «Biz kelesi jyly oblysty jergilikti kókónis, et jáne sút ónimderimen tolyqtaı qamtamasyz etýge tyrysýymyz qajet», - dedi Berdibek Saparbaev.
Oblys ákiminiń baspasóz qyzmeti jıyn kezinde «Týǵan jer» respýblıkalyq forýmy qorytyndylanǵanyn málimdedi. Endi jumys - kelisimder men memorandýmdardyń oryndalýyn únemi baqylaýda ustaý. Forým kezinde quny 76 mlrd. teńge bolatyn 20- dan astam memorandýmyna qol qoıyldy. Sonymen qatar forým qatysýshylary óńirdiń damýyna 5 mıllıard teńge demeýshilik kómek kórsetedi.
