Saparbaev baspanasyn sý basqan turǵyndarmen kezdesti
AQTÓBE. QazAqparat - Aqtóbe oblysynyń ákimi Berdibek Saparbaev sý basqan baý-baqsha ujymdaryn aralap, adamdarmen kezdesti, dep habarlaıdy QazAqparat tilshisi.
Aqtóbe oblysynda tasqyn sýdan zardap shegip, qaladaǵy mektepterdi panalap jatqan adamdar sany bir kúnde 300-ge tolyqty. Qazir arnaıy beketterde 900-ge jýyq adam jatyr. Olardyń 300-den astamy bala. Óńirdegi tótenshe jaǵdaıǵa baılanysty oblys ákimi Berdibek Saparbaev qysqa merzimdi eńbek demalysyn kúrt aıaqtap, jumysqa qaıta qosyldy. Arnaıy mamandarmen birge qala mańyndaǵy Vohr, Mahambetovka aýyldaryn, ýaqytsha beketterdi aralap kórdi. Qazir ózenderdiń deńgeıi tómendegenimen, baý-baqshadaǵy úılerdiń basym bóligi áli sýda qalyp otyr.
«Qala ákimdiginiń qurǵan arnaıy komıssııasy bar. Sol komıssııa árbir úıdi jeke tekserip, shyǵyndy anyqtaıdy. Ekinshiden, úıdiń zańdylyǵy tekseriledi. Qujaty mańyzdy. Keıin komıssııa sheshim qabyldap, usynys jasaıdy. Qandaı kómek beriletini sol kezde anyqtalady. Aldymen baspanasy zańdastyrylǵan adamdarǵa kómek kórsetiledi. Keıin jaǵdaıy tómen adamdarǵa qamqorlyq beriledi. Máselen, kópbalaly, múgedek, áleýmettik jaǵdaıy tómen otbasy. Qurylys materıaldary beriledi. Al tasqyn kezinde mal shyǵyny bolsa, qujat boıynsha óteledi. Eger úıler zańsyz bolsa, tirkelmese, aldymen tirkeýden ótedi. Qazirgi zańǵa sáıkes baspanasy rásimdelmegen bolsa, shyǵyn ótelmeıdi. Biraq materıaldyq kómek beriledi»,- dedi Berdibek Saparbaev baspanasy sýǵa ketken Mahambetovka, Vohr turǵyndaryna. 
Halyqty sabyrǵa shaqyrǵan oblys ákimi tabıǵatqa eshkimniń qarsy kele almaıtynyn, ózge óńirlerde de dál osyndaı jaǵdaı bolǵanyn aıtty.
«Áli sý ketip bitken joq. Qarǵalydan da keledi. Sonyń bárin durys ótkizýimiz kerek. Eshqaısysyńyz kómeksiz, baqylaýsyz, qaraýsyz qalmaısyzdar. Barlyq nárse zańǵa sáıkes jasalady», - dedi B.Saparbaev.
Aıta keteıik, Aqtóbedegi sý tasqyny kezinde baý-baqsha ujymdary ǵana emes, qala irgesinde Qýraıly aýyl da zardap shekti. Qazirgi ýaqytta bul aýyldaǵy 18 úıdi sý basty. Sońǵy málimetke súıensek, óńirde barlyǵy 600-den astam aýla men úıdi sý basty. 2 myńǵa jýyq adam evakýatsııalanyp, 69 adam qutqaryldy. Al 700-ge jýyq adam týǵan týystaryn panalap júr. 
