Saparbaev baspanasy sýǵa ketken adamdarmen dóreki sóılesken qyzmetkerlerge eskertý jasady
AQTÓBE. QazAqparat - Aqtóbe oblysynyń ákimi Berdibek Saparbaev sý tasqyny saldarynan zardap shegip, kóńili alań bolyp otyrǵan halyqpen óte sypaıy sóılesýge shaqyrdy, dep habarlaıdy QazAqparat tilshisi.
Búgin qysqa merzimdi demalysyn kúrt úzip, jumysqa shyqqan oblys ákimi Berdibek Saparbaev qalanyń sýǵa ketken aýyldary men sý qoımalaryn aralady. Buǵan deıin habarlaǵanymyzdaı, halyqpen sóılesip, aldaǵyjosparlaryn aıtyp berdi.
Keshkilik ákimdikke kásipkerler men qoǵamdyq uıym ókilderi, memlekettik organ basshylary men orta, joǵary oqý oryndarynyń basshylary jınaldy. Óńir basshysy halyqqa kómek berý, aryz-shaǵymdy qarap, shyǵyndy esepteý jumystaryn birge atqarýǵa shaqyrdy.
«Jumyla kótergen júk jeńil demekshi, túsken aýyrtpalyq barlyǵymyzǵa ortaq, birdeı. Onyń ústine qıyndyq kórip otyrǵan bizdiń jerlesterimiz. Olar ózderiniń jalǵyz ekenin sezbeýi kerek. Kezdesý kezinde baspanasyn sý basqan adamdar kómektesip, qoldap jatqan Aqtóbeniń azamattaryna rahmetin aıtty. Jumysty biz ári qaraı jalǵastyrýymyz kerek. Jastar ózderi júr. Eriktilerdi kúshtep, olarǵa buıryq berip jatqan eshkim joq. Qajet kezde adamdardy arqalap tasyp, qaıyqpen kómektesip jatyr. Dál osyndaı jaǵdaıda bizdiń birligimiz kórinedi. Komıssııa múshelerine, qala ákimi men oblystyq shtabqa beriletin tapsyrma bar. Este bolsyn, qınalǵan adamǵa qarapaıym, jaqsy sóılese, «jaǵdaıyń qalaı» dep aıtsa, oǵan bir úı salyp, aqsha bergen sııaqty bolady. Men baıqaımyn, keıbir bizdiń jigitter olarmen dóreki sóılesedi, anaıy sóılesedi. Olaı bolmaıdy. Ózi qınalyp tursa, oǵan taǵy da «seniń úıiń durys salynbaǵan», «seniń úıiń anaý, seniń úıiń mynaý» dep aıtý qate. Shynyn aıtý kerek, biz olardyń kim ekenin, qaıdan kelgenin bilemiz. Olar jaı, erikkennen kelgen joq. Kezinde keldi, turatyn jeri bolmady, sol jerden úı saldy. Qaıtemiz endi. Zańmen alsaq, qazir zańsyz dep aıtýǵa bolady. Biraq adamda adamı qasıetter bolýy kerek», - dedi Berdibek Saparbaev.
Óńir basshysy kásipkerlerdiń kómegi qajet ekenin aıtty. Ásirese, sý tasqyny kezinde zardap shekken iri zaýyt, óndiris ornynyń jumysshylary tirkelse, ujymdyq kelisim shart, jumysshy aldyndaǵy jaýapkershilikti eskerý tapsyryldy. Tipti, baspana máselesin sheship berý múmkindigin qarastyrýdy usyndy. Aldaǵy ýaqytta sýǵa ketken aımaqty tazalaý, kógaldandyrý jumystaryn arnaýly orta, joǵary oqý oryndarynyń stýdentteri jumyldyrylatyn bolady. Partııalardyń da belsendiligin arttyrý mańyzdy.
«Nur Otan» partııasynyń oblystyq fılıaly uıyqtamaýy kerek. «Nur Otan» barlyq jerde birinshi bolýy kerek. Uıymdastyrýshy, iske uqypty bolyp, basqa partııalardy jumyla jumys isteýge shaqyrý kerek. Ázirge, ondaıdy kórip otyrǵanym joq. Sonymen qatar, áleýmettik jeli arqyly jalǵan aqparat taratqandar zań boıynsha jazalanady. Aqparat kerek bolsa, oblystyq, qalalyq shtab bar. Tipti, 11 komıssııa jumys istep tur. Bolmasa, maǵan habarlasyńdar, men beremin aqparatty»,- dedi Berdibek Saparbaev.
Jıyn kezinde jyl saıyn qaıtalanatyn saıajaı aýmaǵyndaǵy úılerdiń sýǵa ketý máselesin túbegeıli sheshýge jospar qurý tapsyryldy. Aldaǵy eki jylda sýǵa ketý qaýpi joq saıajaıdaǵy úıler zańdastyrylyp, al jyl saıyn tasqyn sýdyń astynda qalatyn aýmaqtaǵy úılerdi basqa jerge kóshirý jumysy atqarylýy tıis.
Jıyn sońynda Berdibek Saparbaev sý tasqyny bolmaıtynyn, biraq áli de birqatar máseleler bar ekenin atap ótti. Keıin qıyn kezde qol ushyn sozyp, kómektesken kásipkerlerge, eriktiler men qoǵamdyq uıym múshelerine alǵysyn jetkizdi.
