Saparbaev: Balany saýdaǵa salýǵa bolmaıdy
AQTÓBE. QazAqparat - Aqtóbe oblysynyń ákimi Berdibek Saparbaev baspanasy sýda qalyp, oqýlyǵyna bola ýaıymdaǵan 10 jastaǵy Mahabbat Eshimova týraly pikirin bildirdi, dep habarlaıdy QazAqparat tilshisi.
Aqtóbe qalasyndaǵy sý tasqyny kezinde Mahambetovka aýylynyń turǵyny Mahabbat Eshimovanyń jylap, yzalanyp, ókpe-nazyn bildirgeni týraly beınematerıal ınternetti shýlatty. Keıin jergilikti ákimdik M.Eshimovanyń mektepte oqyp júrgenin, qajetti kómek kórsetilgenin aıtty. Birer aptadan soń Eshimovter áýletine almatylyq kásipker Qaırat Qudaıbergen úsh bólmeli páter syılady . Búgin sý tasqyny kezinde baspanasy qırap qalǵan aqtóbelikterge páter kiltin syılaǵan oblys ákimi Berdibek Saparbaev jylap, ashýmen eldi shýlatqan Mahabbat Eshimovaǵa qatysty óz pikirin aıtty.
«Balanyń áke-sheshesi ne úshin kerek? Balany saýdaǵa salýǵa bolmaıdy. Búkil Qazaqstandy shýlatty. Adamda namys, uıat degen bolýy kerek qoı», - dedi óńir basshysy B.Saparbaev.
Búgin «Nur-Aqtóbe» yqsham aýdanyndaǵy kópqabatty úıden páter alǵan Talǵat Lepesovtiń balasy Islam jylap, eldi shýlatqan Mahabbat Eshimovamen birge oqıdy eken.
«Biz de bilemiz dál solaı shyryldaýdy. Biraq oǵan barmaımyz. Islam degen balammen ekeýi bir klasta oqydy. Muny jylatpaımyz, nege jylamatyz?» - dedi Nurgúl Baqytova. Olardyń aıtýynsha, Mahabbat Eshimovanyń baspanasy qulamaǵan. Biraq oqýshy qyz sý tasqyny kezinde qıraǵan Lepesovterdiń úıiniń janynda sýretke túsken.
