Saparbaev aýyl turǵyndaryn kásippen aınalysýǵa shaqyrdy
AQTÓBE. QazAqparat - Aqtóbe oblysynyń ákimi Berdibek Saparbaev memlekettik baǵdarlamalardy tıimdi paıdalanyp, kásippen aınalysýǵa shaqyrdy. Bul týraly oblys ákiminiń baspasóz qyzmetine silteme jasap QazAqparat tilshisi habarlaıdy.
Aqtóbe oblysynyń ákimi Berdibek Saparbaev Temir aýdanynyń áleýmettik-ekonomıkalyq damýymen, memlekettik baǵdarlamalardyń oryndalýymen tanysyp, turǵyndarymen kezdesti. Temir qalasynda S.Báıishev atyndaǵy orta mektepke qazir 400 bala oqyp jatyr. Bıyl kúrdeli jóndeý jumystaryna 17 mıllıon teńge bólinip, ıgerildi. Mekteptegi fızıka, hımııa, bıologııa, ınformatıka kabınetteri jabdyqtalyp, ınteraktıvti synyptar jumys istep tur. Oqý orny «Samruk-Kazyna Trust» qorynyń «Meniń elim» jobasy aıasynda qajetti sport quraldarymen jabdyqtalǵan. Óńir basshysy óz sapary kezinde 1870 jyly salynǵan shirkeýdi qalpyna keltirý jumysymen tanysty. Bul - oblystaǵy eń kóne ǵımarattardyń biri, sáýlet eskertkishi bolyp tabylady.
Keıin oblys ákimi Berdibek Saparbaev Keńqııaq aýylyna bardy. Munda bıyl 250 oryndy «Zere» balabaqshasy ashylǵan bolatyn. Sonymen qatar 40 orynǵa arnalǵan hostel jumysyn bastady. Aýyl turǵyndarymen kezdesýi kezinde óńir basshysy halyqty kásipkerlikpen, aýyl sharýashylyǵymen, sonyń ishinde sýarmaly eginshilikpen aınalysýǵa shaqyrdy. Aýdandaǵy eldi mekenderdi gazben qamtamasyz etý, eńbekaqyny kóterý jáne jańa mádenıet úıin salý máseleleri talqylandy. Kezdesý Shubarshı aýylynda da ótti.
«Aýyl sharýashylyǵy men kásipkerlikti damytýǵa baǵyttalǵan memlekettik baǵdarlamalar bar. Keńqııaq pen Shubarshıda olar paıdalanylyp jatqan joq. Bul baǵdarlamalar aýyldy jumyspen qamtýǵa, azamattardyń ál-aýqatyn jaqsartýǵa zor múmkindik beredi, tek nıet bolsa bolǵany, erinbeı, memlekettiń kómegin paıdalaný kerek»,-dedi oblys ákimi Berdibek Saparbaev.
Kezdesý kezinde aýyl turǵyndary avtokólik joldaryn jóndeý, medıtsınalyq beket pen sport ǵımarattaryn salý boıynsha saýaldaryn qoıdy.
