Saparbaev ár aýylǵa sport alańyn salýdy tapsyrdy
AQTÓBE. QazAqparat - Aldaǵy eki jylda Aqtóbeniń ár aýylyna sport alańy salynyp, aýdan ortalyqtarynda dene shynyqtyrý jáne sport keshenderi paıdalanýǵa berilýi tıis. Bul oblys ákimi Berdibek Saparbaev bergen tapsyrma, dep habarlaıdy QazAqparat tilshisi.
Aqtóbe oblysynda bıyl «Balalar jyly» jarııalandy. «Baqytty balalyq shaq» atty aktsııa aıasynda balalarǵa oıyn alańyn salý tapsyrylǵan bolatyn. Kásipkerler óńir basshysy Berdibek Saparbaevtyń bul usynysyn qoldady. Bilim berý, mádenıet, shyǵarmashylyq, sport, ıntellektýaldyq tárbıe men balalardy damytýǵa baǵyttalǵan segiz baǵyt boıynsha jumys júredi. Sonymen qatar, 2020 jylǵa deıin úsh aýysymdyq jáne apatty jaǵdaıdaǵy mektepter máselesi sheshiledi.
«Oblysta mektep jasyndaǵy balalardyń sany jyl saıyn artyp keledi. Osyǵan baılanysty úsh aýysymdy jáne apatty mektepter máselelerin sheshýge erekshe nazar aýdarylyp otyr. Ótken jyly 15 jańa mektep paıdalanýǵa berildi, qazirgi kezde 26 mekteptiń qurylysy júrgizilip jatyr. 2019 jylǵa qaraı apattyq jaǵdaıdaǵy mektepterdiń, al 2020 jylǵa deıin úsh aýysymdy oqytý máselelerin sheshýdi josparlap otyrmyz», - dedi oblys ákimi Berdibek Saparbaev.
Aqtóbede balabaqsha suranysy 2020 jyly tolyq qamtamasyz etiledi. Buǵan deıin habarlaǵanymyzdaı, jergilikti kásipkerler memlekettik-jekeshelik seriktestik aıasynda balabaqsha salýǵa yntaly. Qazirgi kezde óńirde balabaqshamen qamtý kórsetkishi 96% qurady.
«Óńir basshysy aýdan ákimderine 2018-2019 jyldar ishinde barlyq aýyldardy sporttyq alańdarmen jabdyqtaý, aýdan ortalyqtarynda dene shynyqtyrý-saýyqtyrý keshenderin salý tapsyrdy», - dedi Aqtóbe oblysy ákiminiń baspasóz qyzmeti.
Aıta keteıik, bıyl Áıteke bı, Yrǵyz, Qarǵaly, Mártók aýdanynda dene shynyqtyrý, sport keshenderi salynady.
