Saparbaev: Ár aýdan eń kem degende bir otbasyǵa úı alýǵa kómektesýi kerek
AQTÓBE. QazAqparat - Aqtóbe oblysynyń ákimi Berdibek Saparbaev sý tasqyny kezinde zardap shekken otbasylarǵa tek qala emes, aýdan ákimdigi de kómektesýi kerek ekenin jetkizdi, dep habarlaıdy QazAqparat tilshisi.
Aqtóbe sý tasqynynyń saldarymen kúres jumystaryn bastady. Qazir qaladaǵy birneshe mobıldi top shyǵyndy anyqtaý jumystaryn júrgizip jatyr. Óńirdiń áleýmettik-ekonomıkalyq damý kórsetkishiniń alǵashqy toqsanyn qorytyndylaǵan jıyn kezinde tasqyn sýdan zardap shekkenderge kómek jaıy aıtyldy. Oblys ákimi Berdibek Saparbaev ár aýdan eń kem degende bir otbasyǵa úı alýǵa kómektesýi kerek degen usynysyn jetkizdi.
«Aýdanǵa kóship baram degender bar shyǵar. «Kóship barasyń ba? Mine úıiń, mine jeriń, mine jumysyń» dep aıtý kerek. Báriniń Aqtóbede turýy mindetti emes ǵoı. Aqtóbede kúrkede turǵansha aýdandaǵy jaqsy úıde, taza aýada turǵan jaqsy emes pe? Sondyqtan osy jaǵynan da jumys jasaýymyz kerek. Ár aýdan eń kem degende bir otbasyǵa úı alýǵa kómektesýi kerek. Qalanyń ákimimen birige jumys isteńizder»,- dedi óńir basshysy Berdibek Saparbaev.
Aıta keteıik, baspanasynan aıyrylǵan 800-ge jýyq adam qazir mektepterdi panalap otyr. Ótken aptada bastalǵan sý tasqyny saldarynan 700-ge jýyq úı sý astynda qaldy. Tasqyn kezinde 2 myńǵa jýyq adam evakýatsııalandy.
