Saparbaev áleýmettik jelide kóterilgen máselelerge jedel áreket etýdi tapsyrdy
Aqtóbe oblysy ákimdiginde ótken jıyn kezinde azamattardyń áleýmettik jelidegi aryz-shaǵymdary men olardy der kezinde sheshý máselesi qaraldy.
«Áleýmettik jelilerdi taldaý kezinde kommýnaldyq qyzmet jumysyna shaǵymdanatyn aqtóbelikterdiń sany artqany baıqaldy. Shaǵymdardyń deni joldyń jaǵdaıy, aıaq alǵysyz batpaq, júrginshi jolynyń joqtyǵy, sonymen qatar qoqystyń ýaqytynda shyǵarylmaýyna baılanysty. Sońǵy aıdyń ishinde Eset batyr, Qulymbetov, Bókenbaı batyr, Narımanov kóshelerindegi, 41 razezd, Áýe qalashyǵy, Ońtústik-Batys-1, Batys aýdandaryndaǵy, Prıgorodnyı, Kirpishti jáne taǵy basqa aýyldardaǵy batpaqqa qatysty 80-nen astam shaǵym tústi. Sonymen qatar, turǵyn úılerdiń aýlalaryndaǵy qoqys úıindilerine qatysty 40-tan astam jazba jarııalanǵan»,- dedi oblys ákiminiń apparat basshysy orynbasary Erlan Qattabekov.
Oblysy ákiminiń baspasóz qyzmetiniń habarlaýynsha, qoǵamdyq kólik jumysyna, avtobýs aıaldamalarynyń jaǵdaıyna, káriz qubyryna arnalǵan lıýktiń ashyq qalýyna, jaryǵy joq kósheler máselesine kóńili tolmaǵan aqtóbelikter óz jazbalaryn áleýmettik jelige qaldyrǵan.
«Mundaı problemalar aýdandarda da bar. Máselen, Hromtaý aýdanyna qarasty Sarysaı aýylynyń halqy júrginshi jolynyń joqtyǵyna ashynady. Oıyl aýdanynyń halqy batpaq pen jol jabyndysyna kóńilderi tolmaıdy»,- dedi E.Qattabekov.
Jıyn kezinde máselelerdiń sheshimi de aıtyldy. Ol úshin shaǵyn aýdandardy, jol boıyn kógaldandyrý, júrginshiler jolyn salý, qurylys alańdaryna kirý kezinde júk kólikterin tazartý usynyldy. Keshendi jumys máselelerdi oń sheshýge kómektesedi.
Aqtóbe oblysynyń ákimi Berdibek Saparbaev usynystardy qoldap, olardy oryndaý úshin quziretti memlekettik organdar men kommýnaldyq kásiporyndarǵa tapsyrma berdi. Ári azamattardyń aryz-shaǵymdaryna, ásirese áleýmettik jelilerdegi máselelerge jedel áreket etýdi talap etti.