Saparbaev álem chempıondaryna páter men kólik syılady
AQTÓBE. QazAqparat - Aqtóbe oblysynyń ákimi Berdibek Saparbaev sambodan álem chempıony Eset Qýanovqa avtokólik, grek-rım kúresinen álem chempıonatynyń kúmis júldegeri Meırambek Aınaǵulovqa páter syılady, dep habarlaıdy QazAqparat tilshisi.
Aqtóbe sportshylary bıyl joǵary jetistikterge qol jetkizdi. Álem chempıonattaryna qatysqan balýandardyń shoqtyǵy bıik tur. El namysyn qorǵaǵan sportshylardy óńir basshysy Berdibek Saparbaev qabyldap, olardy jeńisimen quttyqtady. Kezdesýge sambodan álem chempıony Eset Qýanov, grek-rım kúresinen ótken álem chempıonatynyń kúmis júldegeri Meırambek Aınaǵulov, Qytaıdyń Taıbee qalasyndaǵy dúnıejúzilik ýnıversıadada qola medaldy jeńip alǵan dzıýdoshy Rýstam Ybyraev pen Sochıde ótken sambodan álem chempıonatynyń qola júldegeri Amandyq Asaýuly shaqyryldy.
Aqtóbe oblysy ákiminiń baspasóz qyzmetiniń habarlaýynsha, kezdesýde kásibı sportshylardy daıarlaý jáne buqaralyq sportty damytý suraqtaryn talqylandy.
«Bizdiń mindetimiz - sportshylarǵa jaǵdaı jasap, zamanaýı talaptar men standarttarǵa saı jańa sport nysandaryn salý jáne ashý. Sizder oblystaǵy sport ınfraqurylymdarynyń damýyna basa nazar aýdarylyp jatqanyna kýásizder jáne bul jumys jalǵasatyn bolady», - dedi oblys ákimi Berdibek Saparbaev.
Jeńiske jetip, jyldar boıǵy eńbeginiń jemisin kórgen sportshylarǵa únemi qoldaý bolady. Oblys sportshylary men jattyqtyrýshylaryna arnaıy stıpendııalar taǵaıyndalǵan, ýaqtyly tólenedi. Aldaǵy ýaqytta Qazaqstan qurama komandasyna ilikken sportshylarǵa qoldaý kórsetý jalǵasady.
«Biz qashanda sizderdi qoldaımyz, al sizder týǵan jerińizdiń namysyn qorǵap, bapkerlerińizdiń, ata-analaryńyz ben jankúıerlerińizdiń úmitin aqtańyzdar»,- dedi oblys ákimi. Keıin halyqaralyq jáne respýblıkalyq jarystarda jeńiske jetken sportshylarǵa alǵysyn bildirdi.
Aqtóbe oblysynyń ákimi Berdibek Saparbaev balýan Meırambek Aınaǵulovqa bir bólmeli páter, Eset Qýanovqa avtokólik kiltin tabys etti. Al Rýstam Ybyraev pen Amandyq Asaýuly 500 myń teńgeden syıaqy aldy. Alǵys hattar men syıaqylar sportshylardyń bapkerlerine de berildi.
