Saparbaev: Aqtóbedegi úılerdiń shatyry nege tek qyzyl bolýy kerek?
AQTÓBE. QazAqparat - Aqtóbe oblysynyń ákimi Berdibek Saparbaev qala qurylysy keńesine qatysty. Jıyn kezinde turǵyn úı qurylysy kezinde kók jáne qyzyl tústiń jıi qoldanylatynyn synǵa aldy, dep habarlaıdy QazAqparat tilshisi.
Aqtóbelikter turǵyn úı, áleýmettik nysan qurylysy kezinde esh ózgeristerdiń baıqalmaıtynyn aıtqan. Buryn Elbasy Nursultan Nazarbaev «Nur Aqtóbe» aýdanynyń qurylysymen tanysyp, bir-birinen esh aıyrmashylyǵy joq turǵyn úılerdi synaǵan bolatyn. Soǵan oraı oblys ákimi Berdibek Saparbaev ta qala basshysy Іlııas Ispanovqa arnaıy tapsyrma berdi. Biraq, áli kúnge deıin kópqabatty turǵan úıler sol baıaǵy jobamen salynyp jatyr. Ózgeris shamaly. 
«Bıyl qala qurylysy komıssııasynda 94 joba qaraldy. Jobany jergilikti, Almaty qalalarynyń jobalaýshylary usyndy. Kóbine kópqabatty turǵyn úı, bıznes nysandary men mádenıet, bilim, densaýlyq saqtaý salasynyń ǵımarattaryna arnalǵan jobalar qaraldy. Jobanyń 24-i qaıta óńdeý úshin keri qaıtaryldy»,- dedi qala ákimi Іlııas Ispanov.
Jıyn kezinde oblys ákimi Berdibek Saparbaev qala kórkin keltirip, elimizdegi úlgili tórt oblystyń biri bolý úshin áli kóp jumys tyndyrý kerek ekenin aıtty.
«Bizdiń úıdiń shatyrlary nege qyzyl bolýy kerek? Bári sondaı. Basqa tús joq pa? Kóbine qyzyl jáne kók tús paıdalanylady. Basqasy joq. Biz qurylys kezinde bárin eskerýmiz qajet. Birinshiden, kópqabatty turǵyn úıdiń birinshi qabaty bızneske berilýi kerek. Ol dárihana, aýla klýby, tipti, ýchaskelik polıtsııa beketi bolýy múmkin. Ekinshiden, Aqtóbeniń seısmıkalyq jaǵdaıyna oraı jertólelerdi avtoturaq retinde paıdalanýǵa bolady. Jobalaýshylar osyny mindetti túrde eskerýi tıis»,- dedi oblys ákimi Berdibek Saparbaev.
Sonymen qatar ákim balalardyń oıyn alańy, sport alańy men júrginshiler jolyn salýdy tapsyrdy. Sýaǵarlar men aryqtar da basty nazarda bolýy tıis.
